Baebol i talem se laef blong ol man i “fulap long trabol.” (Job 14:1) Tede yumi evriwan i stap kasem ol defdefren kaen trabol. Be sam man oli no glad nating long laef, i olsem we oli stap long ples we i tudak we i tudak olgeta, mo oli ting se i no gat wan gudfala fiuja. ?Yu tu yu gat tingting olsem? Sipos yes, i gud yu tingbaot se Baebol i tokbaot wan nambawan fiuja. Tingbaot ol eksampol ya:

• Baebol i talem long yumi se Jehova God i mekem plan blong wol ya i gud tumas.—Jenesis 1:28.

• Jehova God i promes blong mekem wol ya i kam wan paradaes.—Aesea 65:21-25.

• Yumi sua se promes ya bambae i kamtru. Revelesen 21:3, 4 i talem se:

  “Naoia God i mekem ples blong hem wetem ol man. Hem bambae i stap oltaem wetem olgeta, mo olgeta bambae oli man blong hem. God bambae i kampani wetem olgeta, mo hem bambae i God blong olgeta. Hem bambae i ravemaot wota blong ae blong olgeta. Nao bambae i no moa gat man i ded, mo bambae man i no moa krae from man we i ded. Bambae i no moa gat man i krae, mo bambae man i no moa harem nogud long bodi blong hem. Ol samting ya blong bifo oli lus olgeta.”

Promes ya i no wan samting we yu yu wantem nomo se i kamtru. Jehova God i wantem tumas blong mekem promes ya i kamtru, mo hem i gat paoa blong mekem olsem. Baebol i tokbaot promes we i tru, mo promes ya i olsem wan stret ansa long kwestin ya se “?From wanem mi laef?”

TINGBAOT SAMTING YA: Taem yu fesem wan trabol we i mekem yu harem nogud, yu olsem wan bot we i fesem strong win. Be ol promes long Baebol oli olsem wan strong angka we i mekem tingting blong yu i strong.

?YU SAVE MEKEM WANEM?: I gud yu stat naoia blong faenemaot samting we Baebol i talem se bambae oli kamtru long fiuja. Ol Witnes blong Jehova bambae oli glad blong givhan long yu. Yu save toktok stret wetem olgeta long ples blong yu, no yu go long Websaet ya, jw.org. *