“Kada tuig, halos 3 milyones ka lapsag ang nagakapatay sa una nga bulan sang ila kabuhi, nga ang kalabanan nga kabangdanan puede tani malikawan. Sobra 30 porsiento sini nga mga lapsag ang nagakapatay sa una nga adlaw sang ila kabuhi.”—Save the Children International.

Suno sa Public Health England, sang 2011, nagdamo ang napatay bangod sa polusyon sa hangin sa 15 ka banwa sa London. Makalilibog ini kay ginapatihan nga mas matinlo ang krudo bangod diutay lang ang ginapagua sini nga aso kag mas barato ikumparar sa iban nga gatong. Pero 91 porsiento sang polusyon sa hangin sa sina nga lugar naghalin sa de-krudo nga mga salakyan.

Suno sa surbe sang Public Opinion Foundation sang Rusya sang 2013, mga 52 porsiento sang mga Ruso nga nagapangangkon nga Ortodokso nga Cristiano ang nagsiling nga wala pa sila makabasa bisan isa ka bahin sang Biblia, kag 28 porsiento ang nagsiling nga talagsa lang sila nagapangamuyo.

Suno sa report sang World Bank, nagdiutay ang produkto kag naglala ang kapigaduhon bangod indi mahibaluan kon sin-o ang nagapanag-iya sang mga ulumhan. Ang katunga sang wala pa makultibar nga duta sa bilog nga kalibutan—mga 202 milyones ektaryas—ara sa Aprika, nga ang produksion 25 porsiento lang kuno sang potensial sini.

Ginabayluhan sang pila ka eskwelahan kag unibersidad ang ila mga libro sing electronic tablet nga nagaunod na sang mga kinahanglanon nga impormasyon, software, apps, kag iban pa nga file. Pero ginabinagbinag pa kon mas barato ini.