“Buri mwaka, abana hafi imiliyoni 3 barapfa batararenza n’ukwezi, benshi muri bo bagapfa bahitanywe n’ibintu bari gushobora gukingirwa. Abarenga ica gatatu bapfa umusi baba bavukiyeko.”—Vyavuzwe n’Ishirahamwe mpuzamakungu rikingira agateka k’abana (Save the Children International).

Urwego ruraba ivy’amagara y’abantu mu Bwongereza rwavuze ko mu 2011 habaye iyongerekana ry’igitigiri c’abapfa biturutse ku gutosekara kw’ikirere mu turere 15 tw’i Londres. Amazutu yaravuzwe neza kubera ko adatosekaza ikirere cokimwe n’ibindi bitoro kuko adahera ningoga kandi akarekura umwuka muke wonona ikirere witwa gaze karubonike. Ariko igitangaje ni uko ibice 91 kw’ijana vy’imicafu itosekaza ikirere muri utwo turere, iva ku miduga inywa amazutu.

Mu 2013, urwego rwo mu Burusiya rutohoza ivyiyumviro vy’abanyagihugu rwaragize itohoza. Iryo tohoza ryerekanye ko ibice nka 52 kw’ijana vy’abavuga ko ari abakirisu bo mw’idini ry’aborotodogisi biyemereye yuko batarigera basoma n’igice na gitoyi ca Bibiliya. Ibice 28 kw’ijana na bo bavuga ko basenga gake kabaho.

Raporo yagizwe n’Ibanki y’isi yose ivuga ko ingorane yo kutamenya neza uwo itongo ryegukira ituma hataboneka umwimbu, ubukene na bwo bukabandanya. Muri Afrika ni ho hari ica kabiri c’ubutaka butarimwa bwo kw’isi yose, ni ukuvuga nk’amahegitari imiliyoni 202. Bivugwa ko umwimbu wo muri Afrika ungana n’ica kane c’umwimbu isi yaho yari ishoboye gutanga.

Mu mashure atari make no mu makaminuza amwamwe, ibitabu biriko birasubirizwa n’utwuma two mu buhinga bwa none twitwa tablettes. Utwo twuma tuba turimwo ibisomwa bikoreshwa kw’ishure, uduporogarama be n’ibindi. Ariko rero hari abamaze guserura amakenga y’uko ivyo vyoba bitwara uburyo bwinshi gusumba ibitabu.