BAYUNI nkobali koonse-koonse munyika, alimwi bali akati kazilenge zitakatazyi kweebela. Kuyungizya waawo, misyobo yabayuni, mubala, twiimbo, nzyobacita alimwi azilengwa zyabo zilakonzya kupa kuti kweebela bayuni kakukkomanisya kapati.

Mulakonzya kweebela bayuni abuzuba nokuba kuzwa awindo yamuncikini yanu, ibayuni aaba babikkilizya: bamintengwe ibalya banamula, tuyuni tulya nziniini itwiitwa kuti tyrant flycatcher, nziba zyeebana, tumembya tuyaka ziteente naa muyuni uutegwa goldfinch uusanina twana twakwe.

Bayuni bamwi balakonzya kumukkomanisya ciindi nobauluka, bayuni mbuli basikwaze, baluunga, alimwi abatumba. Bamwi inga bamugambya: mbuli tutiiti tulwanina zyakulya, mukombwe wankwilimba uuli mukoongelezya nkwilimba nseke, naa tuyuni tuuluka antoomwe alimwi akuleleenga antambo zyamalaiti. Alimwi akwalo kweebela bayuni banji baulukila antoomwe akulonga kuunka kubusena bumwi kulakonzya kumukkomanisya. Masimpe, kulonga kuli boobu kwalikulangililwa kwamyaka minji, alimwi kupa basikulangilila kugambwa akaambo kanguzu zyakucikonzya kuzyiba nkobaya bayuni aaba kakunyina kusweeka. Mubwini, Mulengi wakaamba kuti: “Itongola lyakujulu lilizi ziindi zyalyo zyeelede. Sicinkwela asikamembya  asikolyo boonse balibwene ziindi zyabo zyakuboola.”—Jeremiya 8:7.

Bbaibbele lilaamba makani manji kujatikizya bayuni kutegwa lituyiisye ziiyo zigwasya. Mucikozyanyo, kujatikizya mpowani alimwi amboizuza, Leza wakaambila Jobu kuti: ‘Pele naakuti yavwunkumuka, akuvwapaula mababa aanjiyo, ilanyansya bbiza amutanti walyo.’ * (Jobu 39:13, 18) Alimwi Leza wakabuzya Job kuti: “Sa sikakonze ulaya mujulu akubaamina kumusanza mababa aakwe akaambo kabusongo bwako? Ndijwi lyako sena liulusya nsika?” (Jobu 39:26, 27) Ino twiiya nzi kumakani aaya? Bayuni balacita zintu zinji kakunyina lugwasyo lwesu. Zintu nzyobacita zitondezya busongo bwa Leza, kutali busongo bwesu.

Mwami Solomoni wakalemba kuti “ijwi lyanziba lyamvwigwa,” kutondezya kuti cilimo ciyanda kutalika. (Lwiimbo lwa Solomoni 2:12) Sintembauzyo wakaamba makani aakamembya ciindi naakali kulemba kujatikizya luyandisyo ndwaakajisi lwakubelekela kutempele lya Leza,. Kaamba cakunyonokela, wakaamba kuti: ‘Kayuni kalijanina iŋanda, sikamembya wajana citeente cakuzyalila bana bakwe, nkokuti kuzipaililo zyako, O Jehova.’—Intembauzyo 84:1-3.

Makani aamwi aamba bayuni akaambwa a Jesu Kristo. Amulange-lange majwi aajanika mulugwalo lwa Matayo 6:26: “Amulangisye bayuni bauluka mujulu; tabasyangi mbuto naa kutebula nokuba kuyobola mumatala. Nokuba boobo, Uso wakujulu ulabasanina. Sena tamuyandiki kwiinda mbabo?” Cikozyanyo eeci cinjila mumoyo cakabagwasya basikutobela Jesu kuzyiba kuti balayandika kapati kuli Leza alimwi tiibakeelede kulibilika kujatikizya ziyandika mubuumi.—Matayo 6:31-33.

Mazuba aano, kweebela bayuni caba cakulikondelezya cizyibidwe, alimwi eeco cilamvwika nkaambo bayuni balatugambya mbobacita zintu, mbobaboneka kabotu, mbobeebana, alimwi anyimbo nzyobaimba. Kuyungizya waawo, basikulangilila balakonzya kwiiya zintu zigwasya kujatikizya buumi. Sena ‘muyoobalangisya bayuni’?