Ang ubang kapolisan naggamit ug teknolohiya aron dili peligro ang paggukod ug sakyanan. Pananglitan, ang grill sa mga patrol car gitaorag compressed-air launcher nga motira ug GPS-trackable device nga mopilit sa sakyanang gukdon. Ang sakyanan sa mga kriminal masundan nga dili sobra ka kusog ang dagan.

Gibanabana nga matag oras, usa ka babaye ang mamatay sa away tungod sa bugay. Bisag ang kostumbre sa paghatag ug pagdawat ug bugay gidili sa balaod, sa 2012 kapin sa 8,200 ka babaye ang gipamatay kay ang pamanhonon o iyang pamilya gigamyan ra sa bugay sa babaye.

Nakita diha sa gigming nga mga sensor nga gitaod diha sa tulo ka sayaw sa Europe didto sa ilang itloganan nga ang mga langgam nakalupad ug kapin sa 200 ka adlaw nga walay hunong samtang nanglalin ngadto sa Africa. Kaniadto, mga hayop lang sa dagat ang gikataho nga nakahimo niining walay hunong nga pagpanglalin.

Ang mga pirata naka-hijack ug 179 ka barko sa kadagatan sa Horn of Africa tali sa Abril 2005 ug Disyembre 2012. Kini nga krimen mikitag $413 milyones (U.S.) nga tubos sa barkong gipang-hijack sa mga pirata, sumala sa banabana sa World Bank.