ကားတွေကို လိုက်လံဖမ်းဆီးတဲ့အခါ အန္တရာယ်နည်းစေတဲ့ နည်းပညာကို ရဲတွေအသုံးပြုနေကြပါပြီ။ သူတို့စမ်းသုံးတဲ့နည်းတစ်နည်းက ကင်းလှည့်ရဲကားမှာ ဂျီပီအက်စ် စနစ်သုံး အာရုံခံကိရိယာ ပစ်လွှတ်နိုင်တဲ့စက် တပ်ဆင်ထားတယ်။ လိုက်နေတဲ့ကားမှာ အဲဒီကိရိယာ ကပ်သွားပြီဆိုရင် နောက်ကနေ အရမ်းမောင်းပြီး လိုက်စရာမလိုဘဲ အန္တရာယ်ကင်းတဲ့နှုန်းနဲ့ နောက်ယောင်ခံလိုက်နိုင်ကြပါတယ်။

သတို့သမီးဘက်ကပေးရတဲ့ခန်းဝင်ပစ္စည်းနဲ့ပတ်သက်ပြီး အငြင်းပွားမှုကြောင့် တစ်နာရီမှာ အမျိုးသမီးတစ်ယောက်နှုန်း အသတ်ခံရတယ်လို့ ခန့်မှန်းထားကြတယ်။ အဲဒီလိုပေးတာ၊ ယူတာကို တရားဝင်တားမြစ်ထားပေမဲ့ သတို့သား ဒါမှမဟုတ် သူ့မိသားစုက သတို့သားရရှိတဲ့ပစ္စည်းက နည်းတယ်လို့ယူဆတာကြောင့် ၂၀၁၂ ခုနစ်မှာ အမျိုးသမီး ၈,၂၀၀ ကျော် အသတ်ခံရတယ်။

အယ်လ်ပိုင်းပျံလွှားငှက်တွေဟာ သူတို့ပေါက်ဖွားတဲ့နေရာကနေ ဆောင်းခိုဖို့ အာဖရိကကို ရက်ပေါင်း ၂၀၀ ကျော်မနားတမ်း ပျံသန်းကြတယ်ဆိုတာကို ပျံလွှားသုံးကောင်မှာ တပ်ပေးလိုက်တဲ့ အာရုံခံကိရိယာကနေ သိရတယ်။ အရင်တုန်းကဆိုရင် ပင်လယ်သတ္တဝါတွေကိုပဲ အဲဒီလိုခြေရာခံနိုင်ကြပါတယ်။

၂၀၀၅၊ ဧပြီလကနေ ၂၀၁၂၊ ဒီဇင်ဘာလအတွင်း အာဖရိက ဦးချိုဒေသရဲ့ ကမ်းရိုးတန်းမှာ ပင်လယ်ဓားပြတွေက သင်္ဘော ၁၇၉ စီးကို အပိုင်စီးခဲ့ကြတယ်။ အဲဒီလိုအပိုင်စီးတာကြောင့် ပင်လယ်ဓားပြတွေဟာ အမေရိကန်ဒေါ်လာ ၄၁၃ သန်းရရှိခဲ့ကြတယ်လို့ ကမ္ဘာ့ဘဏ်က ခန့်မှန်းထားပါတယ်။