Ua faaaogā e nisi leoleo ni faiga faaonapōnei e faaitiitia ai lamatiaga pe a tuli se taavale. O se tasi o auala ua faataʻitaʻia o le faapipii lea o se tamaʻi masini i luma o taavale a leoleo, ma e fana atu se mea e taʻua o le GPS trackable device ma pipii i le taavale o loo tuliloa. O lenā GPS o le a iloa ai le auala o loo agaʻi i ai le taavale, ma mafai loa ona faalemu le taavale a leoleo ma mulimuli atu i ai.

I se fua faatatau, e fasiotia i itula taʻitasi se fafine ona o ni feeseeseaʻiga i meaalofa e foaʻi atu i le tama faaipoipo. E ui ua faasā lenei tū o le avatu pe talia foʻi na meaalofa, ae i le 2012, e silia i le 8,200 tamaʻitaʻi na fasiotia, ona e manatu le tama faaipoipo po o lona aiga e lē lava meaalofa na avatu.

Na faapipii ni tamaʻi masini faailoilo i manulele e tolu e taʻua o le alpine swift, ma ua iloa ai na felelei na manulele e aunoa ma le mālōlō, mo le silia i le 200 aso a o agaʻi atu i Aferika. I aso ua mavae, na taʻua i lipoti e na o meaola o le sami na mafai ona malaga mo lenā umi.

Iā Aperila 2005 e oo iā Tesema 2012, na ave faamalosi ai e ni seila faomea vaa e 179 mai le ogāsami i mātū i sasaʻe o Aferika (Horn of Africa). I se suʻesuʻega a le Faletupe o le Lalolagi, e pe ā ma le $413 miliona tupe Amerika ua totogi atu i na seila faomea, ina ia toe faafoʻi mai ai vaa.