Maphorisa man’wana ma tirhisa thekinoloji ku hunguta makhombo lama vaka kona loko ku hlongorisiwa timovha. Ma vekela muchini lowu fanaka ni xibalesa lowu tirhaka hi moya emahlweni ka timovha ta wona. Loko muchini wolowo wu balesela wu humesa swilo leswi fikaka swi namarhela movha leyi nga eku hlongorisiweni leswaku yi ta kota ku voniwa laha yi fambaka kona. Kutani ma yi hlongorisa handle ko tsutsuma hi rivilo lerikulu.

Ku ringanyetiwa leswaku awara yin’wana ni yin’wana, ku dlayiwa wansati hikwalaho ka timholovo leti pfuxiwaka hi ndzovolo lowu wansati a wu humesaka loko a lovola wanuna. Hambileswi mukhuva lowu wu yirisiweke hi mfumo, hi 2012 vavasati lava tlulaka 8 200 va dlayiwile hikwalaho ka leswi muteki kumbe swirho swa ndyangu wakwe a swi sola leswaku wutsongo ndzovolo lowu humesiweke hi mutekiwa.

Michini leyitsongo leyi kotaka ku twa leyi vekeriweke eka tinyenga tinharhu leti a ti ri eswisakeni, yi kombise leswaku swinyenyana leswi swi haha masiku yo tlula 200 swi nga kalanga swi yima endleleni loko swi rhurhela eAfrika. Enkarhini lowu hundzeke a ku vuriwe leswaku i swiharhi swa le matini ntsena leswi kotaka ku endla tano.

Exikarhi ka April 2005 na December 2012, swigevenga leswi fambaka hi swikepe swi tlhakise 179 wa swikepe eribuweni leri nga eVuxeni bya Afrika. Bangi ya Misava yi ringanyeta leswaku swigevenga sweswo swi koxe mali ya kwalomu ka mune wa tibiliyoni wa tirhandi leswaku swi ta ntshunxa swikepe leswi tlhakisiweke.