BISAN gamay lang ang Belize, madamo ang makita diri—halin sa mga kagulangan asta sa matin-aw nga tubig sa baybayon nga nagalibot sa mga isla. Pero indi lang amo sini ang katahom nga makita mo sa Belize.

Ginatos ka espesyi sang pispis kag sapat ang makita sa sini nga pungsod. Lakip sa sini ang masili sing kolor nga keel-billed toucan (Ramphastos sulfuratus) kag ang Baird’s tapir (Tapirus bairdii)—malaba sing ilong nga pamilya sang rhino nga madasig maggiho bisan sa tubig! Makita man diri ang jaguar (Panthera onca). Ang matuod, ginapabugal sang Belize ang pinakauna nga jaguar preserve.

Ang Belize bahin anay sang sibilisasyon sang Maya. Nag-abot diri ang Espanyol nga mga manugsakop sang ika-16 nga siglo, pero wala gid nila napierde sing bug-os ang Maya. Sang ulihi, gin-agaw ini sang Britanya kag sang 1862, opisyal ini nga gindeklarar nga kolonya sang British Honduras. Sang 1981, nangin independiente ini.

 Lainlain nga grupo sang tawo ang makita sa Belize. Ang pila ka dalagku nga etniko nga grupo amo ang Creole, East Indian, Garifuna, Maya, kag Mestizo. Mainabyanon kag matinahuron ang mga tawo diri. Kon nagaistorya ang mga bata sa mga hamtong, masami nagagamit sila sing termino nga “Miss” ukon “Mister” kag nagasabat sing, “Huo, ma’am” ukon “Indi, sir.”

Sa Belize, may mga kongregasyon sa American Sign Language, Belize Kriol, English, Low German, Mandarin Chinese, Maya (Mopán), kag Spanish. Sang 2013, mga 1 sa kada 40 ka tawo diri ang nagtambong sa Memoryal sang kamatayon sang Cristo upod sang mga Saksi.