BELIS i gat planti naispela samting long lukim, olsem i gat ol bikbus, ol nambis, na ol liklik ailan. Na tu, i gat planti arapela samting i stap long Belis.

Planti handret narapela narapela pisin na ol animal i stap long dispela kantri. Olsem, i gat pisin keel-billed toucan (Ramphastos sulfuratus) na Baird’s tapir (Tapirus bairdii), em wanpela animal i luk olsem rainoseros na em inap muv hariap tru maski em i stap long graun o long solwara! Na tu, i gat wanpela bikpela pusi em ol i kolim jagua (Panthera onca). Planti man i tok Belis em fes kantri we ol i wokim wanpela zu bilong lukautim ol jagua.

Bipo lain Maya i bin stap long Belis. Long 1550 C.E. samting ol soldia bilong Spen i go long Belis bilong pait long ol Maya, tasol ol i no daunim ol. Bihain lain Briten i pait na daunim ol Belis long 1862 na ol i kolim dispela kantri olsem British Honduras. Long 1981, Belis i kisim indipendens.

 Ol tumbuna bilong lain Belis i kam long planti narapela ples. Sampela bilong ol em lain Garifuna, Is India, Kriol, Maya, na lain Mestiso. Lain Belis i gat gutpela pasin pren na ol i save rispektim ol narapela. Taim ol pikinini i toktok long ol man i bikpela pinis, planti taim ol bai tok Mis na Mista, na ol i save bekim tok olsem, “Yes, ma’am” na “No, sir.”

Long Belis, i gat planti kongrigesen bilong ol Witnes Bilong Jehova long ol narapela narapela tokples. Olsem, i gat tokples sain bilong Amerika, Belize Kriol, Inglis, Low German, Mandarin bilong Saina, Maya (Mopán), na tok Spen. Long 2013, wanpela long olgeta 40 man i bin bung wantaim ol Witnes Bilong Jehova long tingim dai bilong Krais.