“Agka manggawa na nipaakar ed sika na pinanday a talintao, odino say kapadpara na antokaman a nengneng na wala ed tawen ed tagey, odino wala dia ed dalin ed leksab, odino wala dia ed danum ed leksab na dalin. Agka ondakmomo ed sikara, ni say manlingkor ed sikara.”—Exodo 20:4, 5.

Nanengneng ed interon Hebreon Kasulatan, odino say Daan a Sipan, ya mauges so pangusar na imahen

SAY IBABAGA NA ARUM

Unong ed New Catholic Encyclopedia, dakdakel so imahen na saray Judio ya uusaren dad panagdayew da “tan sarayan representasyon et gagalangen.” Saray alimbawa ya imbaga na satan ya encyclopedia et saramay akaukit ya prutas, rosas, tan ayayep ed templo na Jerusalem.—1 Arari 6:18; 7:36.

NO ANTOY NEPEG MON NAAMTAAN

Kabaliktaran ed ibabaga na New Catholic Encyclopedia, ag-angusar iray matoor ya Judio na antokaman ya akaukit odino estatua diad templo ed panagdayew da. Diad tua et anggapoy nabasad Biblia ya walay matoor ya Israelita ya angusar na imahen ed panagdayew to.

NO ANTOY KUAN NA BIBLIA

Imbaga na Dios: “Say gloriak agko naani iter ed sananey, tan agko met iter so galang ko ed saray imbolik a talintao.”—Isaias 42:8.

“Anto so pipaknaan na templo na Dios ed saray idolo? . . . Agyo la didiwiten so marutak a bengatla.”—2 Corinto 6:16, 17.

“Seguradon nabigla iray inmunan Kristiano ed anggan ideya labat ya mangikargay imahen ed saray simbaan, tan seguradon ipasen dan idolatriya so idakmomo odino pampikasi ed saratan.”—History of the Christian Church

SAY IBABAGA NA ARUM

“Agnakuestion so impangusar na imahen ed panagdayew na saray inmunan Kristiano,” so imbaga na New Catholic Encyclopedia. “Nanengneng so art na saray inmunan Kristiano ed saray catacomb. . . . Akadispley ni ingen ed saray masanton kuarto parad panagdayew tan saray ponponan iray karakter ed alamat nensaman.” *

NO ANTOY NEPEG MON NAAMTAAN

Say sankadaanan iran imahen a naromog ed sarayan catacomb—underground ya sementeryo nensaman—et inusar nen komatlon siglo la. Manga 200 taon kayari impatey nen Jesus. Kanian, say ibabaga na New Catholic Encyclopedia ya “panagdayew na saray inmunan Kristiano” et aliwan sankaunaan ya Kristianon panagdayew—samay paraan na panagdayew na saray disipulo nen inmunan siglo ya atukoy ed Kristianon Griegon Kasulatan o say Balon Sipan. Ipapanengneng labat na saray imahen ed saray catacomb ya kasabi komatlon siglo, saramay mangibabagan Kristiano ira et inalig da ray pagano ed panguusar day imahen pian nasagyat da ran manpakomberte. *

NO ANTOY KUAN NA BIBLIA

“Ibatikan yo so idolatriya.”—1 Corinto 10:14.

“Paliisan yo iray idolo.”—1 Juan 5:21.

Say pangusar na saray imahen ed panagdayew et agsusuportaan na Biblia. Kanian agmanguusar iray Tasi nen Jehova na imahen, tan agmet ira mangikakarga diad abung da odino ed pasen a pandadayewan da

SAY IBABAGA NA ARUM

“Lapud say dayew ya iiter ed imahen et makasabi ed samay irerepresenta to,” so kuan na New Catholic Encyclopedia, “say panagdayew sirin ya parad sakey ya persona et sarag to met ya iter ed imahen ya mangirerepresentad sikato.”

NO ANTOY NEPEG MON NAAMTAAN

Nen imbangat nen Jesus iray disipulo to no panon so pampikasi, agto imbagan mangusar ira na imahen. Say bangat ya pangusar na imahen ed panagdayew ed tuan Dios et anggapod Kristianon Griegon Kasulatan.

NO ANTOY KUAN NA BIBLIA

“Si Jehova a Dios mo so nepeg mon dayewen, tan sikato labat so nepeg mon panlingkoran.”—Mateo 4:10.