IMATAM BIBLIA NIN
Taytacha-mamachakunamanta
Wara-waranqantin Diosman sonqo runakunam taytacha-mamachata yupaychanku. Chayqa, ¿Diospa agradonpaqchu kanman? ¿Ima nintaq Biblia chay costumbremanta?
¿Diosman sonqo ñawpa judiokunaqa yupaycharqakuchu taytacha-mamachata?
“Amam taytacha-mamachataqa rurankichu imaman rikchakuqtapas, hanaq pachapi kaqman rikchakuqtapas, kay pachapi kaqman rikchakuqtapas nitaq allpapa ukun yakupi kaqman rikchakuqtapas. Amam qonqorakunkichu chaykunapa ñawpaqninpiqa, amataqmi adorankichu.” (Exodo 20:4, 5)
Ñawpaq Testamentopiqa sutillatam Diosqa kamachirqa taytacha-mamachata mana yupaychanankupaq
¿IMATAM RUNAKUNA NINKU?
Judiokunaqa tukuy rikchaq taytacha-mamachakunatam servichikurqaku Diosta yupaychanankupaq nispa (New Catholic Encyclopedia). Chay nisqanku cierto kasqanta qawachinankupaqmi rimanku Jerusalen templopa ukunpi adornananpaq ruwasqanku waytakunamanta, frutakunamanta hinaspa animalkunamanta (1 Reyes 6:18; 7:36).
¿IMATAM YACHANAYKI?
Chay qellqapa nisqanman hina Diosman sonqo judiokunaqa manam yupaycharqakuchu templopi adornokunataqa. Bibliaqa manataqmi ninchu taytacha-mamachata servichikuspa Diosta yupaychasqankumantaqa.
¿IMATAM BIBLIA NIN?
Isaiasnintakamam Dios nirqa: “Hukkuna adoranankutaqa manam permitisaqchu. Ñoqamanta sapaqta alabanankutaqa manam permitisaqchu”, nispa (Isaias 42:8).
¿Punta kaq cristianokunaqa taytacha-mamachatachu servichikurqaku Diosta yupaychanankupaq?
“Diospa templonqa manam taytacha-mamachakunapaqchu. [. . .] Amayá hapiychikchu millakuypaq kaqkunataqa.” (2 Corintios 6:16, 17)
Cristianokunapa vidanmanta willakuq librom nin: “Punta kaq cristianokunaqa millakuypaqchá qawanmanku karqa taytacha-mamachata templopi churaytaqa, chaynataq chaykunapa ñawpaqninpi qonqoraspa mañakuytapas”, nispa (History of the Christian Church)
¿IMATAM RUNAKUNA NINKU?
Huk libropim nin: “Punta kaq cristianokuna Diosta yupaychanankupaq taytacha-mamacha servichikusqankumantaqa manam iskayrayanikuchu”, nispa. Chaymantapas ninmi: “Cristianokunapa pampakusqanku (catacumbas) corredorkunapim yupaychanankupaq ruwasqanku kaqkuna kachkan. [. . .] Pampakusqanku otaq rezakunanku sitiokunapim ñawpa runakunapa yupaychasqanku taytachakuna karqa”, nispa (New Catholic Encyclopedia). *
¿IMATAM YACHANAYKI?
Pampasqanku corredorkunapi taytacha-mamachakunata tarisqankuqa Jesuspa wañusqanmanta 200 wata pasayta cristiano tukuqkunapam karqa. Chay tiempopaqqa Cristopi iñiq tukuqkunam Diosta mana yupaychaq runakunapa costumbrenman hina yupaychanankupaq taytacha-mamachakunata hinaspa tukuyta servichikuyta qallaykurqaku, yaqapaschá chayta ruwarqaku cristianokuna astawan achkayanankuta munaspanku. *
¿IMATAM BIBLIA NIN?
“Amayá adoraychikchu taytacha-mamachakunataqa”, nispa (1 Corintios 10:14).
¿Yanapawanchikmanchu taytacha-mamachaqa Diosta yupaychanapaq?
“Karunchakuychikyá taytacha-mamachakunamantaqa.” (1 Juan 5:21)
Bibliaqa manam yachachinchu taytacha-mamachata yupaychay costumbremantaqa. Chaymi Jehova Diospa testigonkunaqa Diosta yupaychanankupaqqa mana servichikunkuchu taytacha-mamachataqa, nitaq wasinkupipas otaq huñunakunanku wasikunapipas waqaychankuchu
¿IMATAM RUNAKUNA NINKU?
Huk librom willakun: “Mayqen santotapas otaq mamachatapas yupaychaspaqa kikintam yupaychachkanchik”, nispa (New Catholic Encyclopedia).
¿IMATAM YACHANAYKI?
Jesusqa manam yachachirqachu taytacha-mamachantakama Diosman asuykunankupaqqa. Mosoq Testamentopiqa manam mayqen partenpipas ninchu taytacha-mamachata servichikuspa Diosta yupaychanapaqqa.
¿IMATAM BIBLIA NIN?
“[Jehova] Diosllaykitam adoranki, payllatataqmi servinkipas”, nispa (Mateo 4:10).