IA AU I TE BIBILIA
Te mau hohoˈa
Ma te aau haavare ore, e faaohipa e mirioni taata i te mau hohoˈa no te haamori i te Atua. Ia au râ i te Bibilia, mea tano anei tera peu? E mauruuru anei te Atua i te reira?
Ua faaohipa anei te mau ati Iuda taiva ore i te hohoˈa no te haamori i te Atua?
“Eiaha roa oe e hamani i te tii tarai hia no oe e te hohoa no te hoe mea i nia i te rai ra, e no te hoe mea i raro i te fenua nei, e no te hoe mea i roto i te pape i raro ae i te fenua ra. Eiaha roa oe e haamori atu, e e tavini atu.”—Exodo 20:4, 5, Te Bibilia Moˈa V.C.J.S., 1976.
Ua faautuahia te peu e faaohipa i te hohoˈa no te haamori i te Atua i roto i te taatoaraa o te mau papai Hebera tei matauhia i te parau, te Faufaa Tahito
TA TE RAHIRAA E PARAU
Ia au i te tahi buka, ua faaohipa te mau ati Iuda e rave rahi hohoˈa i roto i ta ratou haamoriraa “e e taoˈa faahanahanahia, haafaufaahia e haamorihia te reira.” (New Catholic Encyclopedia) Ua faahiti hoi tera buka i te hiˈoraa o te mau maa hotu, tiare e animara e rave rahi tei nanaˈohia no te faanehenehe i te hiero i Ierusalema.—Te mau arii 1, 6:18; 7:36.
TE TIA IA ITE
Aita te mau ati Iuda i faaohipa i te tahi noa ˈˈe hohoˈa nanaˈohia aore ra hohoˈa i hamanihia no te hiero no te haamoriraa mai ta te buka i faahitihia e parau ra. Aita hoê aˈe irava Bibilia e faaite ra e ua faaohipa te tahi Iseraela taiva ore i te hohoˈa no te haamori i te Atua.
TA TE BIBILIA E PARAU RA
Teie ta te Atua i parau na roto i te peropheta Isaia, “e ore au e horoa i to ˈu ra hanahana no vetahi ê; e te haamaitai ia ˈu ra i te mau hohoˈa otiotihia [aore ra nanaˈohia].”—Isaia 42:8.
Ua faaohipa anei te mau Kerisetiano matamua i te mau hohoˈa no te haamori i te Atua?
“E aha e tiˈa ai i te nao o te Atua ia faaau ˈe te mau idolo? . . . Eiaha e tapea noa atu i te mea viivii.”—Korinetia 2, 6:16, 17, Te Faufaa Api.
“Mea au ore roa na te mau Kerisetiano matamua ia tuu i te mau hohoˈa i roto i te mau fare pureraa. No ratou, e haamoriraa idolo ia tuturi aore ra ia pure te taata i mua i te reira.”—History of the Christian Church
TA TE RAHIRAA E PARAU
Te na-ô-hia i roto i te tahi buka e “e ere i te mea maitai ia ui e ua faaohipa anei te mau Kerisetiano matamua i te hohoˈa.” Ia au hoi i tera buka, “mea rahi te mau taoˈa hamanihia ma te aravihi i te tau o te mau Kerisetiano matamua tei itehia i roto i te mau vahi hunaraa maˈi. . . . Ua riro atoa te mau hohoˈa e faaite i te mau aai ei taoˈa faanehenehe no te mau piha haamoriraa moˈa e te mau menema.” a—New Catholic Encyclopedia.
TE TIA IA ITE
No te toru noa o te senekele te hohoˈa tahito roa ˈˈe i itehia i roto i teie mau apoo o tei faarirohia ei vahi hunaraa. Ua hamanihia te reira tau 200 matahiti i muri aˈe i to Iesu poheraa. E ere ïa i te mea tano ia parau tera “te haamoriraa a te mau Kerisetiano matamua” mai tei faahitihia i roto i te buka na mua ˈtu. O te mau pǐpǐ matamua hoi tei faaite i te haamoriraa Kerisetiano tumu faataahia i roto i te mau Papai Heleni Kerisetiano, tei matauhia i te parau te Faufaa Apî. Te haapapu ra râ tera mau hohoˈa i itehia, ua haamata tei parau e Kerisetiano ratou i te rave i te peu a te mau nunaa ě ma te faaohipa i te hohoˈa i te toru o te senekele. E au ra e ua na reira ratou no te turai i te taata ia taui i te haapaoraa. b
TA TE BIBILIA E PARAU RA
“E maue ê atu i te haamori idolo.”—Korinetia 1, 10:14.
Mea tia anei ia faaohipa i te hohoˈa ei ravea no te haamori i te Atua?
“E ara ia outou i te mau idolo.”—Ioane 1, 5:21.
Aita te Bibilia e haapii ra ia faaohipa i te mau hohoˈa no te haamori i te Atua. No reira te mau Ite no Iehova e ore ai e faaohipa i te mau hohoˈa i to ratou fare aore ra i ta ratou vahi putuputuraa no te haamori i te Atua
TA TE RAHIRAA E PARAU
Te na-ô-hia ra i roto i te tahi buka, “i te mea e ua riro te haamoriraa i te hohoˈa ei haamoriraa i te taata i faahohoˈahia, e nehenehe ïa te hohoˈa e fanaˈo i te hoê â haamoriraa e te taata no ˈna tera hohoˈa.”—New Catholic Encyclopedia.
TE TIA IA ITE
A haapii ai Iesu i ta ˈna mau pǐpǐ e nafea ia pure, aita oia i parau ia ratou ia faaohipa i te mau hohoˈa. Aita te peu e faaohipa i te hohoˈa no te haamori i te Atua i roto i te mau Papai Heleni Kerisetiano.
TA TE BIBILIA E PARAU RA
“O to Atua o Iehova ta oe e haamori, e oia anaˈe ra ta oe e faaroo.”—Mataio 4:10.
