“Diri ka magbuhat hin tinigib nga ladawan, hin bisan ano nga dagway han bisan ano nga butang nga aadto ha langit, o nga aada ha ilarom ha tuna, o nga aada ha tubig ha ilarom han tuna. Diri ka magyukbo ha ira, saypa hin pag-alagad ha ira.”—Eksodo 20:4, 5.

An paggamit hin mga imahen ha pagsingba ginkukondenar gud ha Hebreo nga Kasuratan, nga kilala sugad nga Daan nga Tugon

AN GINSISIRING HAN MGA REPERENSYA

Sumala ha New Catholic Encyclopedia, damu nga imahen an gin-gamit han mga Judio ha ira pagsingba “ngan ini nga mga ladawan ginpasidunggan, gintahod, ngan ginsingba.” Sugad nga pananglitan, gin-unabi hito nga encyclopedia an damu nga nakaukit nga prutas, bukad, ngan hayop nga igin-adorno ha templo ha Jerusalem.—1 Hadi 6:18; 7:36.

AN SADANG MO HIBAROAN

Kabaliktaran han ginsisiring han New Catholic Encyclopedia, an matinumanon nga mga Judio waray magsingba ha inukit nga mga ladawan o imahen ha templo. Ha pagkamatuod, waray kita mababasa ha Biblia nga may matinumanon nga Israelita gumamit hin imahen ha pagsingba.

AN GINSISIRING HAN BIBLIA

“An akon himaya diri ko ihahatag ha iba,” nagsiring an Dios pinaagi kan propeta Isaias, “diri man an akon pagdayaw ngada ha mga ladawan nga ginuhitan.”—Isaias 42:8.

“Paonan-o magkakaangay an templo han Dios ngan an mga dios-dios? . . . Ayaw na kamo kapot han mahugaw nga butang.”—2 Corinto 6:16, 17.

“An mga Kristiano hadto nangingirhat gud bisan man la ha suhestyon nga magbutang hin mga imahen ha mga singbahan, ngan gintatagad nira nga idolatriya na an pagyukbo o pag-ampo ha atubangan hito.”—History of the Christian Church

AN GINSISIRING HAN MGA REPERENSYA

“An paggamit hin mga imahen ha kadaan nga pagsingba han mga Kristiano diri makatadunganon nga kwestyunon yana,” siring han New Catholic Encyclopedia. “An mga lubnganan han mga Kristiano baga hin mga art gallery han siyahan-siglo nga mga Kristiano. . . . Bisan an susmatanon nga mga tawohan igindisenyo ha sagrado nga mga kwarto para ha pagsingba ngan lubnganan.” *

AN SADANG MO HIBAROAN

An pinakadaan nga mga imahen nga nabilngan hini nga mga lubnganan—mga tanel nga ginamit sugad nga lubnganan—nagtikang la han ikatulo ka siglo. Mga 200 ka tuig ito katapos mamatay hi Jesus. Salit an ginsisiring han New Catholic Encyclopedia nga “kadaan nga pagsingba han mga Kristiano” ha pagkamatuod diri amo an pinakadaan nga pagsingba han mga Kristiano—nga ginbuhat han siyahan-siglo nga mga disipulo ngan iginhulagway han Kristiano Griego nga Kasuratan, nga kilala sugad nga Bag-o nga Tugon. An mga imahen nga nabilngan ha mga lubnganan nagpapakita la nga han ikatulo ka siglo, ginsunod han nag-aangkon nga mga Kristiano an pagano nga kustomre ha paggamit hin mga imahen, posible ha pagdani hin mga kombirte. *

AN GINSISIRING HAN BIBLIA

“Maglikay kamo ha idolatriya.”—1 Corinto 10:14.

“Maglikay kamo ha mga dios-dios.”—1 Juan 5:21.

An paggamit hin mga imahen ha pagsingba usa nga relihiyoso nga buhat nga diri gin-uuyonan han Biblia. Salit diri ito ginbubuhat han mga Saksi ni Jehova, ngan waray liwat hira mga imahen ha ira balay o ha ira mga lugar han pagsingba

AN GINSISIRING HAN MGA REPERENSYA

“Tungod kay an pagsingba nga iginpapahinungod ha usa nga imahen nakakaabot ngan natatapos ha persona nga ginrirepresentaran hito,” siring han New Catholic Encyclopedia, “an sugad nga pagsingba nga iginpapahinungod ha usa nga persona mahimo liwat ipahinungod ha imahen nga nagrirepresentar hito nga persona.”

AN SADANG MO HIBAROAN

Han gintutdoan ni Jesus an iya mga sumurunod kon paonan-o mag-aampo, waray hiya magsiring ha ira nga gumamit hin mga imahen. An ideya mismo ha paggamit hin imahen ha pagsingba ha tinuod nga Dios waray ha Kristiano Griego nga Kasuratan.

AN GINSISIRING HAN BIBLIA

“Hi Jehova nga imo Dios an kinahanglan mo singbahon, ngan ha iya ka la mag-alagad.”—Mateo 4:10.