Tontonkanyeni pa fyakonkapo no kwesha ukwasuka icipusho cakonkapo.

Ni nani mwingatila e wacindama sana?

• ALEX

  Ba Alex balacita amakwebo. Bacishinka mu makwebo yabo, balabombesha kabili ba mucinshi. Apo amakwebo yabo yalenda bwino, balekala bwino no lupwa lwabo.

• PETER

  Ba Peter nabo balacita amakwebo, kabili balapanga indalama ishingi ukucila ba Alex. Na lyo line, apo balafwaisha ukupanga indalama ishingi ukucila abanabo, balabombesha, ne ci calenga balelwala amalwele yalekanalekana.

• JANET

  Janet mwana we sukulu uubelenga sana kabili uwatemwa ukusambilila. Ici calenga alepaasa sana.

• ELLEN

  Ellen alapaasa bwino ukucila na Janet kabili lyonse aba pali balya abapaasa bwino sana. Lelo alabepa pa mashindano pa kuti fye apaase kabili tabika amano ku kusambilila.

Nga mwatila ba Peter na Ellen, nelyo bonse 4 balicindama, ninshi mumona kwati ififuma mu fyo umuntu alecita, e filenga aba uwacindama nangu ca kuti ifyo acita tafyawama.

Lelo nga mwatila ni ba Alex na Janet, ninshi mumona ukuti umuntu uwacindama ni ulya uwaba ne mibele iisuma kabili uubomba bwino. Ico e cishinka. Tontonkanyeni pali ifi:

• Cinshi cingalenga Janet aikala bwino ku ntanshi, bushe kupaasa fye bwino nelyo kutemwa ukusambilila?

• Cinshi cingawamina abana ba ba Alex, bushe kukwata ifintu ifingi ifyo bafwaya nelyo kukwata umufyashi uwatemwa ukuba pamo nabo?

Icishinka ca kuti: Ukucindama kwa cine kumonekela mu fintu ifisuma ifyo umuntu acita, te mu fintu ifingi ifyo akwata.