Kutegwa muzyibe mbomuyeeya, amulange-lange zikozyanyo eezyi zyakuyeeyela.

Nguni ngomukonzya kwaamba kuti wakazwidilila ncobeni?

• BA ALEX

  Ba Alex mbaasimakwebo. Balasyomeka, balabeleka canguzu, alimwi balabalemeka bantu. Makwebo aabo ayaambele alimwi eeci capa kuti balo amukwasyi wabo kabapona kabotu.

• BA CAL

  Ba Cal abalo balijisi makwebo mbuli aaba Alex, alimwi balajana mali manji kwiinda ba Alex. Pele mukuyanda kuti basumpuke kapati, ba Cal balabeleka ciindi coonse alimwi bajisi malwazi aaindene-indene.

• JANET

  Janet mwana wacikolo uubikkila maano kucikolo alimwi uuyandisya kwiiya. Eeci cipa kuti kapasa.

• ELLEN

  Ellen ulapasa kwiinda Janet alimwi boonse balizyi kuti musongo—pele ubelesya nzila zyabumpelenge ciindi camisunko alimwi takukkomanini kapati kwiiya.

Ikuti naa mwaamba kuti Cal alimwi a Ellen—naa boonse bone—bakazwidilila, nkokuti kuzwidilila mukubona muzintu nzyajana muntu zilikke, tacikwe makani anzila nzyabelesya kutegwa ajane zintu eezyo.

Kulubazu lumwi, ikuti naa mwasala ba Alex alimwi aba Janet, nkokuti kuzwidilila mukubona mubukkale bwamuntu alimwi ambwabeleka. Ncamaano kuyeeya boobo. Mucikozyanyo, amulange-lange mibuzyo iitobela.

• Ncinzi cikonzya kumugwasya kapati Janet mukuya kwaciindi—kupasa kapati naa kuba aluyandisisyo mukwiiya?

• Ncinzi cikonzya kubagwasya bana baba Alex—kuba azintu zinji naa kuba amuzyali uutondezya kuti ulabikkila maano kwiizya ambabo?

Masimpe ngakuti: Kuzwidilila ikutali kwamasimpe kuyeeme ampuwo pele kuzwidilila kwini-kwini kuyeeme abukkale bubotu.