Bibliaqa manam yachachinchu wakin runakunalla allin vidapi kanankumantaqa. Manataqmi ninchu munapayaspalla allin vidapi kawsakunamantaqa. Tukuy imayoq kaspalla allin vidapi kawsaymantaqa runakunam yachachinku warmakunaman taksachankumantapacha, chaywanmi wakinqa munasqankuta mana haypayta atispanku hukmanyasqa tarikunku. Ichaqa lliwmi atichwan allin vidapi kawsakuytaqa.

Pipas kallpanchakuspanqa atinmanmi allin vidapi kawsakuyta. Chaypaqyá qatiqninpi yachachikuykunata qawasun.

• ¿IMATAM BIBLIA NIN?

  “Qollqe kuyaq runaqa maynaña qollqewanpas manam contentakunmanchu. Achka imayoqpas kayta munaqqa manam contentakunmanchu.” (Eclesiastes 5:10)

  ¿IMA NINANTAQ CHAYQA? Manam pipas kusikuytaqa rantiyta atinmanchu. Qollqesapa kaqkunaqa llakisqa sonqom tarikunku. Huk doctoram libronpi nin: “Qollqella kuyaqkunaqa chayllam imamantapas preocupakunku hinaspam hukmanyasqa tarikunku. Yachayniyoq runakunam ninku qollqewanqa kusikuyta mana rantiy atisqankumanta. Achka qollqeyoqña karuspapas cuentatam qokunku vidankupiqa mana kusikuyniyoq kasqankuta”, nispa (“La generación Yo”, Jean M. Twenge).

  ¿IMATAM RUWAWAQ? Amayá qollqella kuyaqqa kaychu nitaq tukuy kapuqniyoq kayllataqa munaychu, vidaykipi allinnikipaq kaqkunapiyá kallpanchakuy. Jesusmi nirqa: “Cuidakuychikyá qollqella kuyaruymanta. Runaqa manam tukuy imayoq karunallanpaqchu kawsanan”, nispa (Lucas 12:15).

•  ¿IMATAM BIBLIA NIN?

  “Runaqa alto tukuq rikuriruspanmi chinkarun. Runaqa orgulloso rikuriruspanmi wichirun.” (Proverbios 16:18)

  ¿IMA NINANTAQ CHAYQA? Manam pipas allin vidapiqa tarikunmanchu engañaspa nitaq kikillanpaq munaq kaspanqa. Huk librom willakun empresapi otaq negociopi cuentallikuq runa “mana hatunchakuq llampu soqo kaptinqa” chay empresa allin kasqanmanta. Chaymantapas willakuntaqmi empresapi otaq negociopi cuentallikuq “kikillanpi piensaq hatun tukuq runa kaptinqa cuentallikusqan empresa fracasasqanmanta” (Empresas que sobresalen). ¿Imatam yachachiwanchik? Kikillanpi piensaq hatun tukuq runakunaqa mana allin vidapim tarikunku.

  ¿IMATAM RUWAWAQ? Reqsisqa kanaykipaq hatunchakunaykimantaqa humilde kanaykipaq kallpanchakuy. Bibliam willakun: “Pipas yanqapas-yanqa hatun tukuspaqa kikillanmi engañakun”, nispa (Galatas 6:3). Chayna runaqa tiempo pasasqanman hinam mana allin vidapichu tarikun.

•  ¿IMATAM BIBLIA NIN?

  ‘Runapaqqa allinmi kanman [. . .] llamkasqanmanta kusikuynin.’ (Eclesiastes 2:24)

  ¿IMA NINANTAQ CHAYQA? Allin runa kaspaqa llamkasqanchikpim kusisqa kasunchik. Wawa-churikunaman yachachinamantam huk doctora libronpi nin: “Ima ruwaypipas allin reqsisqa kayta munaspaqa chay ruwaytam allinta yachana, chaypaqqa kallpanchakunam”, nispa (Madeline Levine, Teach Your Children Well). Chayna kallpanchakuqkunaqa fracasaspanpas manam chayllapichu qeparunku, aswanqa kaqmantam kallpanchakunku.

  ¿IMATAM RUWAWAQ? Ima llamkaynikipipas allinta ruway, ima sasachakuy kaptinpas chayta atipanaykipaq kallpanchakuy. Wawa-churiki sasachakuypi kaptinqa ama qamchu allichay, aswanqa atisqankuman hina otaq hayka watayoq kasqankuman hina paykuna allichanankupaq saqey. Chaynata yanapaptikiqa yachanqakum vidankupi ima sasachakuytapas atipayta.

• ¿IMATAM BIBLIA NIN?

  “Wañusqa leonmantaqa kawsaq allqom aswan allinqa.” (Eclesiastes 9:4)

  ¿IMA NINANTAQ CHAYQA? Llamkaynikiqa kanan vida pasanaykipaqmi, manam chayllamanña qokurunaykipaqchu. ¿Allin vidapi kasqaykitachu piensawaq imapaqpas estudiasqaykiman hina llamkayllamanña qokuruspa onqosqaykiwan otaq familiayki manaña respetasusqaykiwan? Allin vidapi kawsaqqa llamkaspapas saludninta hinaspa familianta cuidananpaqmi tiempochakun.

  ¿IMATAM RUWAWAQ? Saludnikita cuiday, allinta puñuy. Llamkayllamanña qokuruspa saludnikita mana cuidaptikiqa otaq familiaykipaq chaynataq amistadnikipaq mana tiempochakuptikiqa vidaykim yanqapaq kanman.

• ¿IMATAM BIBLIA NIN?

  “Mayna kusisqam ‘Diostam necesitani’ niqkunaqa.” (Mateo 5:3)

  ¿IMA NINANTAQ CHAYQA? Vidanchikpi allin kawsakunapaqqa Bibliata estudiaspam yachachisqankunata kasukunanchik. Jehova Diospa wara-waranqantin Testigonkunam yacharunku qollqeta maskanankumantaqa Diospa yachachisqanman hina kawsakuy allin kasqanmanta (Mateo 6:31-33).

  ¿IMATAM RUWAWAQ? Bibliaqa yanapasunkimanmi allin vidapi kawsakunaykipaq. Imaynata estudianapaq kasqanta yachanaykipaq tapukuy llaqtaykipi kaq Testigokunata otaq Internetpi maskay jw.org nisqanta.