WAKINKUM ninku kuyayllapaq kasqanta, wakinkuñataq manchakuypaq kasqanta. Chakisapacha, llampuy-llampuycha hinaspa llipipipiq hatun ñawiyuqmi. Llasayninwan sayayninpas yaqa chayraq ñawin kichakusqa misichapa hinam. ¿Imamantam rimachkanchik? Tarsero sutiyuq animalchamantam.

Astawanyá Filipinas lawpi kaq tarseromanta yachasun. Ñawinkuna, rinrinkuna, makinkuna, chakinkuna hinaspa chupanpas hatun kaspanmi mana tupaq hina uchuychalla cuerpochanwan. Ichaqa, admirakuypaqmi chayna kasqanqa.

RINRIN: Rinrinkunaqa llaspachallam, hinaspam imaymanata kayman-wakman kuyukachachin imatapas allinta musyananpaq. Chaymi yanapan purun misikunamantawan huk hatun animalkunamanta ayqikunanpaq hinaspa mikunanta maskananpaqpas. Tutanmi rinrinta kuyuchin chillikupa, akatanqapa, pichiruchakunapa hinaspa karyakunapa waqasqan lawman. Hinaspam umanta muyuchin hatun ñawinwan mikunanta qawananpaq.

MAKIN: Makinkunaqa llañu kaspichakunaman hapipakunanpaq hinam kachkan. Dedonpa puntachankunaqa punkiy-punkiycham allinta hapipakunanpaq hina kachkan. Puñuspanpas qaqay-qaqaytam hapipakunan, chaypaqqa chupanpiwanmi yanapachikun.

 ÑAWIN: Kay animalchapa sayayninpaqqa llumpay hatunmi ñawinqa, ñutqunmantapas aswan hatunmi ñawinqa hinaspapas mana kuyurispam ñawpaqllaman qawakun. ¿Manachu chayqa sasachan? Manam, kunkantam wasankama muyuchin.

CHAKIN: Kay animalchaqa chakisapa kasqanraykum 6 metrotapuni pawayta atinman. Tutanñataqmi mikunanta hapinanpaq makinta kichariykuspa pawan.

Kay animalchaqa chayllam yarqachikun hinaspam kawsaq uruchakunata mikun, chaymantapas mana hapiykunam, manataqmi wichqasqaqa kawsanmanchu. Filipinas lawpi runakunam kay animalchata qawaspanku anchata admirakunku.