MOLAO WA MOTHEO WA BEIBELE: “Lenyalo a le hlomphege go bohle gomme malao a lenyalo a se be le ditšhila.”—Baheberu 13:4.

MEHOLA: Batho ba bangwe ba lebelela mantšu ao e le a šiilwego ke nako. Eupša ba tloga ba fošitše! Go se botege go sa dutše go kweša bohloko lehono go etša nakong ya ge Beibele e be e ngwalwa.—Diema 6:34, 35.

Jessie, e lego monna yo a nyetšego e bile e le tate o ngwadile gore: “Go botega lenyalong go matlafaditše tswalano ya ka le mosadi wa ka gotee le go oketša lethabo la rena. Ruri potego e bohlokwa kudu lenyalong. Go se botege go senya lenyalo”—re se sa bolela ka tsela yeo go tlago go kgoma bana ka yona!

Ligaya *o ile a bea lenyalo la gagwe kotsing. O re: “Ke ile ka thoma go tlwaelana le batho ba babe. Se se ile sa dira gore ke thome go phela bophelo bja go sepela mašego le go se sa botegela molekane wa ka.” Na tsela ya gagwe ya bophelo e ile ya mo thabiša? Yena le monna wa gagwe ba ile ba dulela go lwa, gomme se sa mo šulafaletša bophelo. O oketša ka gore: “Ge ke nagana ka mahlabišadihlong ao ke ipaketšego ona, ke ile ka bona kamoo batswadi ba ka ba bego ba nepile ge ba re, ‘Ditlwaelano tše mpe di senya mekgwa e holago.’”—1 Bakorinthe 15:33.

Ligaya o oketša ka gore: “Pele dilo di senyega le go feta, ke ile ka phetha ka gore ke tlogele ditsela tša ka tše mpe gomme ke ithute Beibele—mo nakong ye ke diriša seo e se rutago.” Mafelelo e bile afe? O ile a phološa lenyalo la gagwe, gomme monna wa gagwe o ile a thoma go mo swara ka botho le ka tlhompho kutšwanyana. O re: “Beibele e fetotše bophelo bja ka, e bile ga ke itshole ka go tlogela ditsela tša ka tša kgale le bao go thwego ke bagwera.”