BIBLIAPA YACHACHISQAN. “Casado vidaqa llapallanpa respetasqanyá kachun” (Hebreos 13:4).

¿IMAPIM YANAPAWANCHIK? Kunan tiempopi wakin runakunaqa allinpaqñam huchapakuytaqa qawanku, ichaqa pantachkankumá. Casado kaqkunamanta mayqanninpas hukwan huchapakuruptinqa llumpaytam ñakarinku, chaynallataqmi karqa ñawpaq tiempopipas (Proverbios 6:34, 35).

Casarasqa hinaspa churiyuq Jessie sutiyuq runam nin: “Warmiywan kuyanakuspa kusisqa kawsakunaykupaqqa allintam yanapawanku huk sunqulla kasqayku. Allintataqmi yanapawanku kuyanakusqaykumanta mana iskayrayaypas. Huchapakuymi ichaqa kuyanakuyta chinkachin”, nispa. Chaymantapas llumpaytam ñakarichin churi-wawakunatapas.

Casarasqa Cristina * sutiyuq warmim rakinakuymanña chayachkarqa. Paymi nin: “Mana allin amistadkunawanmi kuskanchakuyta qallaykurqani. Sapa tutam mana allin kusirikuykunaman riq kani, hinaspaymi huk qarikunawanpas pierdekuq kani”, nispa. ¿Kusisqachu tarikurqa chayna ruwasqanwan? Manam. Payqa sapa kutim qusanwan lirianakuqku. Nintaqmi. “Mana allinkunaman chayasqaywanmi musyakururqani tayta-mamaypa niwasqanman hina mana allin amistadkunaqa, allin kawsakuqkunata urmachisqanmanta”, nispa (1 Corintios 15:33).

Cristinaqa nintaqmi: “Aswan mana allinkunaman manaraq chayachkaspaymi tantearurqani chay ruwasqaykunata saqinaypaq hinaspaymi Biblia estudiayta qallaykurqani. Tanteakurqanitaqmi Bibliapa nisqankunata kasukunaypaqpas”, nispa. ¿Imaynatam chayqa yanaparqa? Cristinaqa manamá rakinakuymanqa chayarqachu, qusanpas kuyayta hinaspa respetaytam qallaykurqa. Paymi nin: “Bibliam allintapuni vidaypi yanaparuwarqa. Manam ñakakunichu mana allin amistadniykunata hinaspa mana allin ruwasqaykunata saqisqaymantaqa”, nispa.