ARATAIRAA BIBILIA: “Ia haamaitaihia te faaipoipo i te taata atoa ra, e te viivii ore hoi te roi.”—Hebera 13:4.

TE MAU MAITAI: No vetahi, eita tera mau parau e tano no teie tau. Ua hape roa râ ratou! Mai te tau i papaihia ˈi te Bibilia e tae mai i teie mahana, e mauiui rahi mau te itehia ua taiva anaˈe hoê o na hoa faaipoipo.—Maseli 6:34, 35.

Ua papai o Jessie e taata faaipoipo e e metua tane: “Ua faufaa-rahi-hia mâua i te taiva ore o te tahi i nia te tahi, mea piri roa vau e ta ˈu vahine e e oraraa oaoa to mâua. Mea faufaa mau te tiaturi i roto i na hoa faaipoipo. E ore râ tera tiaturi ia taiva hoê.” A manaˈo atoa na ïa eaha te huru o te mau tamarii ia tupu te reira!

Ua haafifi o Ligaya a i to ˈna faaipoiporaa. Te parau ra oia: “Ua haamata vau i te faahoa i te mau amuimuiraa iino. I muri aˈe, i te ori i te po e te pae hopea, ua taiva i ta ˈu tane.” Ua oaoa mau anei oia? Ua tatamaˈi noa raua ta ˈna tane e ua riro ei vahine haapaoraa ore roa. Te na ô faahou ra oia: “I to ˈu feruriraa i ta ˈu i rave no te topa i tera faito, ua taa ia ˈu ua tano roa ta to ˈu na metua i parau pinepine: ‘E ino te parau maitai i te amuiraa iino.’”—Korinetia 1, 15:33.

Te parau faahou ra Ligaya: “Na mua ˈˈe te ohipa a ino roa ˈi, ua faaoti au i te taui roa i to ˈu haerea e te haapii i te Bibilia, i teie nei râ, ma te faaohipa i ta ˈu e haapii.” Eaha te faahopearaa? Ua maitai mai to ˈna faaipoiporaa, ua poihere e ua faatura faahou ta ˈna tane ia ˈna. Ua na ô oia: “Ua taui te Bibilia i to ˈu oraraa e aita roa vau i tatarahapa i te haapae i to ˈu huru tahito e te mau hoa ta ˈu i vaiiho.”