Harĩ andũ aingĩ, kũũria kana nĩ kũrĩ Ngai kuonekaga ta arĩ ũndũ ũtagĩrĩire kana ũtangĩona macokio. Hervé, kuuma bũrũri wa Faranja oigaga ũũ: “O na gũtuĩka niĩ ndirĩ ũmwe wa arĩa metĩkĩtie atĩ gũtirĩ Ngai, kana ũmwe wa arĩa metĩkĩtie atĩ ndangĩmenyeka ũrĩa atariĩ, gũtirĩ wĩtĩkio ngoragwo nũmĩtie. Harĩ niĩ, ũtũũro ũrĩa mwega nĩ kũhũthĩra meciria makwa gwĩtuĩra matua. Ũndũ ũcio ndũrabatara ũteithio kuuma kũrĩ Ngai.”

Angĩ mahota gũkorũo na mawoni ta ma John, kuuma bũrũri wa Amerika (U.S.), ũrĩa woigire ũũ: “Ndaarerirũo nĩ aciari matetĩkĩtie atĩ nĩ kũrĩ Ngai. Ndĩ mũndũ mwĩthĩ, ndingĩahotire kuuga kana nĩ kũrĩ Ngai kana gũtirĩ. No rĩmwe na rĩmwe nĩ ndeeyũragia ũndũ ũcio.”

Hihi nĩ ũrĩ weyũria kana nĩ kũrĩ Ngai, na angĩkorũo arĩ kuo-rĩ, hihi muoroto wa ũtũũro nĩ ũrĩkũ? Angĩkorũo ndwĩtĩkĩtie nĩ kũrĩ Mũũmbi, nĩ kũrĩ maũndũ maritũ ũngĩremwo nĩ gũtaarĩria, ta marĩa sayansi yonanĩtie megiĩ ũrĩa gũkoragwo na ũigananĩru thĩinĩ wa ũũmbi, ũndũ ũrĩa ũhotithagia ũtũũro ũthiĩ na mbere thĩinĩ wa thĩ ĩno iitũ, na marĩa monanagia atĩ muoyo ndũngiuma harĩ kĩndũ gĩtarĩ muoyo.​—Rora gathũndũkũ karĩ na kĩongo, “ Thuthuria Ũira.”

Ta wĩcirie ũhoro wa maũndũ macio twagweta. Mahaana ta ibaũ ironania handũ harĩ na kĩndũ kĩa goro. Ũngĩgĩa na ũira ũronania atĩ Ngai arĩ kuo, o hamwe na ũhoro wa kwĩhokeka ũmwĩgiĩ, no ũkorũo ũgĩĩte na kĩndũ kĩa bata mũno. Kwa ngerekano, reke tuone maũndũ mana ũngĩgĩa namo.

No twende kũmenya muoroto wa ũtũũro nĩ ũrĩkũ, na ũtũhutagia atĩa. Makĩria ma ũguo, angĩkorũo nĩ kũrĩ Ngai na tũtiũĩ, tũgĩtũũraga tũrigĩtwo nĩ ũndũ ũrĩa wa ma na wa bata mũno thĩinĩ wa thĩ na igũrũ.

Bibilia yugaga atĩ Ngai nĩwe Kĩhumo kĩa muoyo. (Kũguũrĩrio 4:11) Kũmenya ũndũ ũcio-rĩ, kũngĩtũma ũtũũro witũ ũkorũo na muoroto na njĩra ĩrĩkũ? Ta wĩcirie ũrĩa Bibilia ĩrutanaga.

Harĩ ciũmbe ciothe iria ikoragwo thĩ, andũ makoragwo marĩ a mwanya. Kũringana na Bibilia, twombirũo nĩ Ngai twĩ na mũhianĩre wake, tuonanagie ngumo ta ciake. (Kĩambĩrĩria 1:27) Makĩria ma ũguo, Bibilia ĩrutanaga atĩ andũ no matuĩke arata a Ngai. (Jakubu 2:23) Gũtirĩ kĩndũ kĩngĩ kĩngĩtũma tũkorũo na ũtũũro ũrĩ na muoroto tiga gũkorũo na ũrata ta ũcio hamwe na Mũũmbi witũ.

Tũngĩgunĩka atĩa nĩ ũndũ wa gũkorũo tũrĩ arata a Ngai? Arata a Ngai nĩ mahotaga kwaranĩria nake na njĩra ya mahoya. Na nĩ eranĩire atĩ nĩ arĩmathikagĩrĩria na akamahingĩria ũrĩa marenda. (Thaburi 91:15) Tũrĩ arata a Ngai, no tũhote kũmũmenya na kũmenya mawoni make maũndũ-inĩ matiganĩte. Ũndũ ũcio no ũtũteithie gũtaũkĩrũo na njĩra njega biũ nĩ ciũria iria nditũ mũno ciĩgiĩ ũtũũro witũ.

Kwa ngerekano, andũ amwe monaga arĩ ũndũ mũritũ gwĩtĩkia Ngai tondũ wa mĩnyamaro ĩrĩa ĩkoragwo thĩinĩ wa thĩ yothe. Moragia atĩrĩ, ‘Mũũmbi ũrĩ hinya wothe etĩkagĩria mĩnyamaro na maũndũ moru nĩkĩ?’

Macokio ma Bibilia nĩ matũũmagĩrĩria, tondũ yonanagia atĩ Ngai ndaatanyĩte andũ manyamarĩkage. Rĩrĩa mũndũ ombirũo, ũtũũro ndwarĩ na mĩnyamaro. Na kuuma o kĩambĩrĩria ndwarĩ muoroto wa Ngai atĩ andũ makuage. (Kĩambĩrĩria 2: 7-9, 15-17) Hihi ũyũ nĩ ũndũ mũritũ gwĩtĩkia? Hihi icio nĩ iroto? Aca. Angĩkorũo nĩ kũrĩ Mũũmbi ũrĩ hinya wothe, na ngumo yake ĩrĩa nene nĩ wendo, no twĩrĩgĩrĩre atĩ muoroto wake nĩ andũ makenere ũtũũro ta ũcio.

Nĩ kĩĩ kĩareheire andũ mathĩna maya tũcemanagia namo? Bibilia ĩtaaragĩria atĩ Ngai ombire andũ marĩ na ũhoti wa gwĩthuurĩra ũrĩa mekwenda gwĩka. Tũtingĩtindĩkwo twathĩkĩre Ngai kĩa hinya, tondũ tũtiũmbĩtwo ta macini. Aciari aitũ a mbere, maathurire kwaga gũtongorio nĩ Ngai. Ithenya rĩa ũguo, maarũmĩrĩire wendi wao nĩ ũndũ wa mwĩyendo. (Kĩambĩrĩria 3:​1-6, 22-24) Maũndũ macio moru tũcemanagia namo, nĩ moimĩrĩro ma ũremi ũcio.

No tũgĩe na thayũ mũingĩ wa meciria nĩ kũmenya atĩ mĩnyamaro ĩrĩa andũ macemanagia nayo, ndĩkoragwo ĩrĩ muoroto wa Ngai. Ĩndĩ nĩ tũiguaga tũkĩenda mũno kwehererio mĩnyamaro, na kũgĩa na kĩĩrĩgĩrĩro kĩa mahinda mokĩte.

O hĩndĩ ĩyo mũndũ wa mbere eehirie, Ngai nĩ eeranĩire atĩ nĩ akaahingia muoroto wake ũrĩa aarĩ naguo harĩ thĩ. Gũtirĩ ũndũ ũngĩmũgirĩrĩria gwĩka ũguo, tondũ we nĩ mwene-hinya-wothe. (Isaia 55:11) Ica ikuhĩ, Ngai nĩ ekweheria moimĩrĩro mothe ma ũremi, na muoroto wake harĩ thĩ na andũ nĩ ũgaakinyanĩra.

Ũndũ ũyũ ũngĩkũguna atĩa? Ta wĩcirie ũhoro wa ciĩranĩro ici igĩrĩ harĩ ciĩranĩro nyingĩ iria Ngai eranĩire cia mahinda mokĩte, iria irĩ thĩinĩ wa Bibilia.

• “Amu-rĩ, no ihinda inyinyi, ũrĩa mwaganu acoke aagwo; ũkabara wega gĩikaro kĩu gĩake, na ndangĩkorũo ho. No rĩrĩ, andũ arĩa ahoreri nĩo makagaya thĩ, na matũũre mekenagĩra tondũ wa kũingĩhĩrũo nĩ thayũ.”​—Thaburi 37:​10, 11.

• “Nake mũndũ ũrĩa ũtũũraga bũrũri ũcio ndarĩ hingo agacoka kuuga ũũ: Ndĩ mũrũaru.” (Isaia 33:24) “Gĩkuũ nĩ kũng’aria akĩng’arĩtie agakĩnina biũ tene na tene; ningĩ Mwathani Jehova nĩakagiria maithori mothiũ mothe.”​—Isaia 25:8.

Nĩ kĩĩ kĩngĩtũma twĩhoke ciĩranĩro cia Ngai iria irĩ Bibilia-inĩ? Morathi maingĩ marĩa marĩ thĩinĩ wa Bibilia nĩ mahingĩte na njĩra ĩroneka wega. O na kũrĩ ũguo, kĩĩrĩgĩrĩro kĩu kĩa mahinda mega mokĩte gĩtieheragia moritũ marĩa tũcemanagia namo. Gũkĩrĩ ũgũo-rĩ, nĩ ũteithio ũrĩkũ ũngĩ Ngai atũheete?

Ngai nĩ atũheaga ũtaaro wa gũtũteithia kũhiũrania na mathĩna, na gũtua matua mega. Matua maingĩ no ma ihinda inini, no mangĩ mahutagia ũtũũro witũ wothe. Gũtirĩ mũndũ ũngĩhota gũtũhe ũtaaro mwega na wa ũũgĩ ta ũrĩa Mũũmbi witũ angĩtũhe. Ũũgĩ wa Jehova nĩguo mwega biũ tondũ nĩ oĩ maũndũ marĩa mothe manahanĩka na marĩa makaahaanĩka. Makĩria ma ũguo, nĩwe Kĩhumo kĩa muoyo. Kwoguo nĩ oĩ ũndũ ũrĩa mwega harĩ ithuĩ.

Bibilia ĩkoragwo na meciria ma Jehova Ngai, kũringana na ũrĩa aatongoririe andĩki na roho wake maandĩke. Thĩinĩ wa Bibilia, nĩ tuonaga ciugo ici: “Niĩ nĩ niĩ Jehova Ngai waku ũrĩa ũkũrutaga maũndũ ma gũkũguna, o we ũrĩa ũgũtongoragia na njĩra ĩrĩa wagĩrĩirũo nĩ kũgera.”​—Isaia 48:​17, 18.

Ngai akoragwo na hinya ũtarĩ gĩthimi, na akoragwo eharĩrĩirie kũũhũthĩra nĩguo atũteithie. Bibilia ĩtaaragĩria Ngai arĩ ta mũciari wĩ wendo na wendaga gũtũteithia. Yugaga ũũ: “Ithe wanyu ũrĩa ũrĩ Igũrũ githĩ ndarĩkĩragĩrĩria kũhe Roho Mũtheru kũrĩ arĩa mamũhooyaga!” (Luka 11:​13, Holy Bible in Gĩkũyũ- Biblica, 2013) Roho ũcio no ũtũtongorie na ũtwĩkĩre hinya.

Hihi ũngĩona ũteithio ta ũcio kuuma kũrĩ Ngai na njĩra ĩrĩkũ? Bibilia yugaga ũũ: “Mũndũ ũrĩa ũkũrongoria Ngai no kinya etĩkie atĩ nĩatũire ho, na atĩ nĩwe ũheaga andũ arĩa mamũcaragia ngerenwa yao.” (Ahibirania 11:6) Nĩguo ũkorũo na ũũma biũ atĩ nĩ kũrĩ Ngai, ũrabatara gwĩthuthurĩria ũira ũrĩa wonanagia atĩ arĩ kuo.

Kũmenya ũũma wĩgiĩ Ngai nĩ kuoyaga ihinda, na hatarĩ nganja no ũgunĩke nĩ ũndũ wa gũthuthuria. Ta wĩcirie ũndũ wĩyoneirũo nĩ Xiujin Xiao, ũrĩa waciarĩirũo China no rĩu aikaraga Amerika (U.S.). Oigire ũũ: “O na gũtuĩka nĩ ndeetĩkĩtie ũrutani wa atĩ indo nĩ kwĩyumĩria cieyumĩririe, nĩ ndeendaga mũno kũmenya ũrĩa Bibilia yugaga. Nĩ ũndũ ũcio ngĩambĩrĩria kwĩruta Bibilia na Aira a Jehova. No mwaka wakwa wa mũico ndĩ korenji, ndagĩire na mĩhang’o mĩingĩ ũũ atĩ ndwarĩ ũndũ mũhũthũ kuona mahinda ma kwĩruta Bibilia. No ndiarĩ na gĩkeno. Ĩndĩ rĩrĩa ndaatuire atĩ ũndũ ũrĩa wa bata harĩ niĩ nĩ kwĩruta Bibilia, nĩ ndaagĩire na gĩkeno.”

Hihi no wende kwĩruta makĩria ũhoro wĩgiĩ Jehova Ngai, Mũũmbi witũ? Geria gwĩka ũrĩa wothe ũngĩhota, ũthuthurie ũhoro makĩria!