Go bonagala potšišo ya ge e ba Modimo a le gona, e sa arabege goba e se bohlokwa go ba bantši. Hervé, yo a goletšego kua Fora, o re: “Le ge ke sa ipitše moilamodimo, ga ke modumedi. Go ya ka nna, ke bona tsela e kaone ya go phela e le ya go diriša mabjoko. Seo ga se hloke gore o dumele go Modimo.”

Ba bangwe ba ka ikwa go swana le John wa kua United States. O re: “Ke godišitšwe ke batswadi bao ba bego ba sa dumele go Modimo. Ge ke sa le lesogana, ke be ke sa tsebe gore ke eme kae tabeng ya ge e ba Modimo a le gona goba a se gona. Eupša ka dinako tše dingwe ke be ke ipotšiša ka taba ye.”

Na o kile wa ipotšiša ge e ba Modimo a le gona, gomme ge e ba o gona, na bophelo bo na le morero? Mohlomongwe o kopane le dintlha tšeo go lego bonolo go di hlalosa ge o bolela ka go ba gona ga Mmopi, tše bjalo ka tsebišo ya tša thutamahlale yeo e hlatselago gore tlhago e reretšwe gore e be le bophelo le bohlatse bja gore bophelo ga bo tšwe dilong tše di sa phelego.—Bona lepokisi le le rego, “ Hlahloba Bohlatse.”

Ela hloko kamoo dintlha tšeo go boletšwego ka tšona ka mo godimo di lego bohlokwa ka gona. Di bjalo ka maswao a tsela ao a lebišago moo go nago le letlotlo. O tla holega kudu ge o ka hwetša bohlatse bjo bo kgodišago bja go ba gona ga Modimo gotee le tsebišo yeo e ka botwago ka yena. Mehlala e mene ya se še.

Ge e ba bophelo bo na le morero, re nyaka go o tseba le go kwešiša kamoo o re holago ka gona. Go ba gona, ge e ba Modimo a le gona gomme re sa lemoge seo, gona re phela ntle le go tseba therešo e bohlokwa kudu legohleng.

Beibele e re Modimo ke Mothopo wa bophelo. (Kutollo 4:11) Go tseba seo go ka dira gore maphelo a rena a be le morero ka tsela efe? Ela hloko seo Beibele e se rutago ka taba ye.

Go dibopiwa ka moka mo lefaseng, batho ke dibopiwa tša moswananoši. Go ya ka Beibele, Modimo o re bopile go swana le yena e le gore re bonagatše semelo sa gagwe. (Genesi 1:27) Go oketša moo, Beibele e ruta gore batho ba ka ba bagwera ba Modimo. (Jakobo 2:23) Ga gona selo seo se ka dirago gore bophelo bja rena bo be le morero go feta go ba le tswalano e bjalo le Mmopi wa rena.

Go ba mogwera wa Modimo go bolela’ng? Bagwera ba Modimo ba ka mo ntšhetša sa mafahleng. E bile o ba holofetša gore o tla ba theetša le go ba araba. (Psalme 91:15) Ge re le bagwera ba Modimo, re ka kgona go tseba megopolo ya gagwe ditabeng tše dintši. Se se tla re nea dikarabo tša dipotšišo tše di tseneletšego ka maphelo a rena.

Ka mohlala, ba bangwe ba thatafalelwa ke go dumela go Modimo ka baka la tlaišego yeo ba e bonago lefaseng ka bophara. Ba ipotšiša gore, ‘Ke ka baka la’ng Mmopi yo matla ohle a dumelela tlaišego le bokgopo?’

Karabo e homotšago ya Beibele ke ya gore Modimo ga se a rera gore batho ba tlaišege. Nakong ya ge go bopša motho, go be go se na tlaišego. Gaešita le lehu le be le se gona morerong wa Modimo wa mathomong ka batho. (Genesi 2:7-9, 15-17) Na go thata go dumela se? Na e fo ba nonwane? Le gatee. Ge e ba go na le Mmopi yo matla ohle e bile lerato e le seka sa gagwe se segolo e le ka kgonthe, gona re ka letela gore e be morero wa gagwe gore batho ba be le mohuta wo wa bophelo.

Go tlile bjang gore batho ba feleletše ba le boemong bjo? Beibele e re Modimo o bopile batho ba na le tokologo ya go ikgethela. Ga re diroboto, ga re gapeletšege go kwa Modimo. Banyalani ba pele, bao batho ka moka ba tšwago go bona, ba ile ba kgetha go se latele tlhahlo ya Modimo. Go e na le moo, ka boithati ba ile ba dira thato ya bona. (Genesi 3:1-6, 22-24) Ga bjale re buna ditlamorago tše bohloko.

Re ka atelwa ke khutšo ya monagano ge re tseba gore ga se morero wa Modimo gore batho ba tlaišege. Eupša ke ga tlhago gore re nyake go imologa tlaišegong. Re nyaka go ba le kholofelo ka bokamoso.

Gateetee ka morago ga gore batho ba rabele, Modimo o ile a holofetša gore o tla phethagatša morero wa gagwe wa mathomong ka lefase ka nako e swanetšego. Ka ge e le yo matla ohle, ga go na seo se ka mo thibelago go dira bjalo. (Jesaya 55:11) Go se go ye kae, Modimo o tla dirolla ditlamorago ka moka tšeo di bakilwego ke borabele kgahlanong le yena, gomme o tla bušetša lefase le batho morerong wa gagwe wa mathomong.

Se se tla bolela’ng go wena? Ela hloko dikholofetšo tše pedi feela go tše dintši tšeo Modimo a di holofeditšego ka bokamoso bja rena, tšeo di hwetšwago ka Beibeleng.

• KHUTŠO YA LEFASE KA MOKA LE GO FEDIŠWA GA BOKGOPO. “Go se gokae yo kgopo o tla be a se sa le gona; wena o tla lebelela lefelo la gagwe, gomme yena o tla be a se gona. Eupša ba boleta bona e tla ba beng ba lefase, ba tla thaba kudu ka baka la go ata ga khutšo.”—Psalme 37:10, 11.

• BOLWETŠI LE LEHU DI TLA FEDIŠWA. “Ga go na modudi yo a tla rego: ‘Ke a babja.’” (Jesaya 33:24) “O tla metša lehu ka mo go sa felego, gomme Mmuši Morena Jehofa o tla phumola megokgo difahlegong ka moka.”—Jesaya 25:8.

Ke ka baka la’ng re ka bota dikholofetšo tša Modimo tšeo di lego ka Beibeleng? Ka gobane diporofeto tše dintši tšeo di begilwego di šetše di phethagetše. Lega go le bjalo, kholofelo ya gore nakong e tlago re tla imollwa tlaišegong ga e fediše mathata a bophelo ao re nago le ona gona bjale. Modimo o re nea thušo efe e nngwe?

Modimo o re nea tlhahlo yeo e re thušago go lebeletšana le mathata le go dira diphetho tše dibotse. Bontši bja diphetho tšeo re di dirago ke tše dinyenyane eupša tše dingwe di na le ditlamorago tša bophelo ka moka. Ga go na motho yo a ka re neago bohlale bjoo bo fetago bjo re ka bo newago ke Mmopi wa rena. Ke motala wa mabaka e bile ke Mothopo wa bophelo. O tseba seo se re swanetšego.

Beibele e na le dikgopolo tša Jehofa Modimo ka ge a buduletše batho ba ba fapafapanego gore ba di ngwale. Ka Beibeleng, re hwetša mantšu a rego: “Nna, Jehofa, ke Modimo wa lena, Yo a le rutago gore le holege, Yo a le sepedišago tseleng yeo le swanetšego go sepela ka yona.”—Jesaya 48:17, 18.

Modimo o na le matla a sa lekanywego le selo, e bile o ikemišeditše go diriša matla a gagwe bakeng sa rena. Beibele e hlalosa Modimo e le tate yo lerato yoo a nyakago go re thuša. E re: “Tate yo a lego legodimong o tla nea gakaakang moya o mokgethwa go bao ba mo kgopelago!” (Luka 11:13) Matla a a tšwago go Modimo a ka re hlahla le go re matlafatša.

O ka hwetša bjang thušo e bjalo go Modimo? Beibele e araba ka gore: “Yo a batamelago Modimo o swanetše go dumela gore o gona le gore e ba moputsi wa bao ba mo tsomago ka phišego.” (Baheberu 11:6) Go re o kgodišege gore Modimo o gona, o swanetše go hlahloba bohlatse ka noši.

Go tsoma therešo ka Modimo go tšea nako, eupša o ka holwa ke go dira bjalo. Ela hloko phihlelo ya Xiujin Xiao, yoo a belegetšwego China gomme ga bjale a dulago kua United States. O re: “Le ge ke be ke dumela thuto ya tlhagelelo, ke be ke ipotšiša ka Beibele. Ka gona ke ile ka thoma go ithuta Beibele le Dihlatse tša Jehofa. Ngwageng wa ka wa mafelelo kholetšheng, ke ile ka swarega kudu moo ke bego ke na le nako e nyenyane ya go ithuta Beibele. Eupša ke be ke sa thaba. Ge ke be ke tsošološa thuto ya ka ya Beibele, ke ile ka thaba.”

Na o ka rata go ithuta ka mo go oketšegilego ka Mmopi wa rena, e lego Jehofa Modimo? Ke ka baka la’ng o sa iphe nako ya go itirela nyakišišo?