HONDURAS, nga sa Kinatsila nagkahulogan ug “lawom,” mao ang pulong nga tingali gigamit ni Christopher Columbus sa paghubit sa kadagatan ubay sa Atlantic Coast niini nga nasod. Ingon pa sa uban, dinhi gibase ang ngalan nga Honduras.

Importante sa mga taga-Honduras nga ang pamilya mag-unongay ug magtinabangay. Pananglitan, ang dagkong desisyon—sama sa galastohan sa pamilya o edukasyon sa kabataan—magtiayon ang mohimo.

Kadaghanan sa taga-Honduras mga mestiso, nga may dugo nga European ug nitibo. Duna pay grupo karon sa mga nitibo, sama sa Chortí. Lahi ang gigikanan sa uban pang nitibo nga namuyo sa Honduras, sama sa mga Garifuna.

Ang mga Garifuna kaliwat sa mga Aprikano ug Carib Indian nga namuyo sa isla sa St. Vincent. Sa mga tuig 1797, ang mga Garifuna nangabot sa Islas de la  Bahía, (Bay Islands). Dayon, sila nanimuyo sa Caribbean Coast sa Central America. Gikan didto ang mga Garifuna nanglalin sa ubang dapit sa Central ug North America.

Ang mga Garifuna abtik manayaw duyog sa tugtog sa mga tambol nga kahoy. Ang tradisyonal nga mga sinina nga hayag ug kolor, pag-asoy ug mga estorya, ug ang pagkaon sama sa ereba (lapad ug nipis nga tinapay gikan sa kamoteng kahoy) maoy bahin sa ilang kultura.

Dunay duolan sa 400 ka kongregasyon sa mga Saksi ni Jehova sa Honduras. May mga tigom sa pagsimba nga ginahimo sa Kinatsila, Iningles, Garifuna, Honduras Sign Language, Mandarin Chinese, ug Miskito.