MUTWE WA PA NKUPIKO | NANCHI MUJI NA BULUME PA BUMI BWENU NYI?
Lukatazho: Kwikala na bya Kuba Byavula
BAANA babena kwimukeba. Wimutwezha nkito naye ubena kwimukeba. Benakwenu babena kwimwita. Bano bonse babena kwimukeba saka mubena kumona bansemi benu bakolwa. Buno kechi bo bwikalo bo mwakebelenga ne, kabiji mubena kukooka bingi pa juba pa juba. Mwakonsha kwiipuzha’mba, “Nsa kuba byepi? Bantu bonse babena kunkeba!” Inge mwauba byo babena kukeba, kwi anweba kyatama, kabiji inge mwauba byo mukeba, kwi abo kyatama. Mwakonsha kuba byepi?
WA KUMWENAKO WA MU BAIBOLO: MOSESA
Byo ajingatu mutonyi bunke mu Isalela, Mosesa wafwainwa walangulukile’mba ubena kuba bintu bulongo. Pano bino, bako banji ba balume bamubuujile’mba: “Kintu kyo mubena kuba kechi kyawama ne. Kine mukakooka.” Bamubuujile’mba apepo bakwabo banabalume bafikilamo mwingilo wa kuchiba mambo, kabiji bakonsha kuletatu mambo kwi aye inge akatazha. Bi ka byafuminemo? Bako ba kwa Mosesa bamubuujile’mba: “Mukepezhezhako mingilo kabiji bantu bonse bakayanga ku mazubo abo na lusekelo.”—Kulupuka 18:17-23.
BYUBA DELINA
Byonkatu byo baamba mu kibaaba kitanshi, Delina ukolwa kikola kya dystonia kilengela mubiji kukola. Kabiji ulama ne bakolojanji basatu balemana. Waamba’mba: “Nataana kuba’mba kwingila mingilo ibena kukebewa jojo juba ne kubula mukose wa kwingila, kukepeshako bijikila. Kubuulako bakwetu lukatazho lwami kulengela bakwetu kunkwasha kuvwangakotu ne ba mwatawami. Kabiji moba onse lukelo ñingilako pacheche kuwamisha maluba pa nzubo, kuba bino kundetela bingi lusekelo.”
“Bintu byonse biji na kimye kyabyo.”—Musapwishi 3:1
BYO MWAKONSHA KUBA
Inge muji na bya kuba byavula mu bwikalo, esekai kuba bino:
-
Monaipo bakonsha kwimukwasha. Kya kumwenako, nanchi mujipo na baana pa nzubo nyi? Nanchi kujipo ba mu kisemi nangwa balunda bekala kipikipi bakonsha kwimukwasha nyi?
-
Babuulai byo mubena kukeba. Kya kumwenako, buulai bemutwezha nkito inge kechi mwakonsha kuba byo babena kukeba ne. Bino kange mwambe nobe mubena kwibachinya’mba musakuleka nkito ne. Babuulaitu makatazho o mubena kupitamo. Bakonsha kwimupako nkito yapeela.
-
Nembai mingilo yo mukengila mu yewo mulungu. Nanchi pajipo yo mwakonsha kupako bakwenu nyi?
-
Inge bemwita ku kijiilo, kechi konse ko mwafwainwa kuya ne. Inge kechi mwakonsha kutaanwako na mambo a kubula kwikala na kimye nangwa bulume ne, babuulai’mba kechi mukataanwako ne.
Kishinka: Inge ke mukebe kuba bintu byonse, mwakonsha kukankalwa kubapo nangwa kimo.
