Sigun iti 2014 a surbey kadagiti 18-25 ti tawenna, 61% kadakuada ti mamati a “saanen a dakkel nga isyu” idiay India ti seks sakbay ti kasar. Maysa a doktor a nakabase idiay Mumbai ti nangibaga iti newspaper a Hindustan Times maipapan iti kapanunotanna a “no sumrek dagiti agtutubo iti maysa a relasion, dina kayat a sawen a pampanunotenda ti pannakiasawa. Awan iti panunotda a masapul nga adda obligasionda iti karelasionda, dayta man ket seksual a pannakidenna iti maysa la a rabii, pannaki-live in wenno saan a serioso a relasion.”

PANUNOTEM: Ania ti ad-adda a mabalin a makagapu iti nasaem a rikna ken sakit a mayakar babaen ti pannakiseks, seks sakbay ti kasar wenno seks kalpasan ti kasar?—1 Corinto 6:18.

Mabalin nga agdoble ti posibilidad a matay dagiti agtawen iti 35-50 no kanayon a makirirririda kadagiti kapamiliada. Iti nasurok a 11 a tawen, minonitor dagiti researcher ti University of Copenhagen ti dandani 10,000 nga agtawen iti agarup 35-50. Natakuatanda a dagidiay kanayon a makiriri iti maysa a nadekket kadakuada ket adayo a dakdakkel ti posibilidadna a matayda a nasapa no ikompara kadagidiay manmano a makiap-apa. Sigun iti maysa kadagiti researcher, ti nasayaat a panangsango kadagiti pakadanagan, kadagiti di pagkikinnaawatan, ken kadagiti kasapulan dagiti kapamilia ket “maibilang nga importante a pamay-an tapno mapabassit ti posibilidad ti nasapa nga ipapatay.”

TI KUNA TI BIBLIA: “Ti asinoman a mangmedmed iti sasaona agtagikua iti pannakaammo, ket ti tao nga addaan panangilasin nalamiis ti espirituna.”—Proverbio 17:27.

Sigun iti nabiit pay a panagadal iti 564 a baro a pagassawaan idiay Louisiana, dagiti nagsina sa nagsinnublianan idi agnobioda pay laeng ket dakdakkel ti posibilidadna a temporario wenno permanente nga agsinada bayat ti umuna a lima a tawen ti panagasawada. Kaaduanna pay nga ad-adu dagiti pagapaanda ken saanda unay a naragsak iti panagasawada.

TI KUNA TI BIBLIA: “Ti pinagsinnangol ti Dios [babaen ti panagasawa] saan koma a pagsinaen ti tao.”—Mateo 19:6.