Kuhehwojola chapwileko muIndia mu 2014, chasolwele nge vakweze vavavulu vamyaka 18 nakuheta 25 vamba ngwavo, “kachapwa chakuhengako kulisavala shimbu kanda valimbate.” Mazu achilolo umwe wamumbaka yaMumbai apwile mulipapilo lyaHindustan Times avulukile nge, “vakweze vali nakulisesembwanga kaha mwomwo yachiseke keshi kufwila kulimbatako. Numba valisavala kaha kamwe chipwe kakavulu, kavashinganyeka vyakulimbata kulutweko.”

VYUMA MWATELA KUSHINGANYEKAHO: Vatu vaze veji kulisavalanga shimbu kanda valimbate navaze veji kulisavalanga nge vanalimbate lyehi, vamwe valihi veji kukwachiwanga chikuma misongo?—Wavaka-Kolinde 1, 6:18.

Mulifuchi kana vatu vali nakufwa muukweze mwomwo yakulikokwejwesa navausoko wavo. Chakutalilaho, hayunivesiti yaCopenhagen vahehwojwele havatu 10,000 hamyaka 11, kaha vawanyine nge vavavulu vaze vapwile nakulikokojwesanga lwola lwosena najitanga javo vafwile washi kuhambakana vaze valikokojweselenga hamwe nahamwe. Mukulwane umwe wavaze vaka-kuhehwojola ambile ngwenyi nge vatu navalinangula mwakukumishila vikokojola mujila yakuunda, “kaha kaveshi kufwa washiko.”

MBIMBILIYA NGWAYO: “Mutu wachinyingi keshi kulusuka kuhanjika mazu enyiko, kaha mutu wakunangakana eji kuholanga kulu.”—Vishimo 17:27.

Kwihwojola chapwileko muLouisiana chavatu 564 vanalimbate kalinwaha chasolwele nge, vatu vaze veji kulikokojwesanga nakwecha kulisesembwa, kaha kutwala muze hinavaputuka cheka veji kupwanga chikuma naukalu nge vanalimbate, nakuhona kusuuluka muulo wavo. Vavavulu veji kulilukululanga shimbu kanda vahete namyaka 5 muulo.

MBIMBILIYA YAHANJIKA NGWAYO: “Chuma chize Kalunga nanungu hamwe mutu kanda achihandununako.”—Mateu 19:6.