Ia au i te tahi titorotororaa i 2014, te manaˈo ra 61% o te feia apî i roto 18 e tae atu 25 matahiti “e ere i te mea ino faahou i Initia” ia taoto i te tahi taata na mua ˈˈe i te faaipoiporaa. Ua faaite te hoê taote no Mumbai i to ˈna manaˈo i roto i te vea Hindustan Times. Teie ta ˈna i parau: “Aita te feia apî e manaˈo ra i te faaipoiporaa a haamatau ai i te tahi taata. E apiti noa râ te tahi no te hoê noa po, no te tahi noa mahana e aore ra no te faaea fare roa ma te ore râ e faaipoipohia.”

A FERURI NA: Mea pinepine aˈe te tahi i te mauiui e te roohia i te maˈi purumu no te mea ua taoto o ˈna i te tane aore ra te vahine hou i te faaipoiporaa aore ra i muri aˈe i te faaipoiporaa?—Korinetia 1, 6:18.

E pohe oioi aˈe te mau melo utuafare o te tatamaˈi pinepine ia naea to ratou 35 e tae atu 50 matahiti. I nia 11 matahiti i te maoro, ua hiˈopoahia 10 000 taata o tera mau faito matahiti e te feia maimi o te haapiiraa teitei no Copenhague. Ua itehia ua pohe oioi aˈe te feia i tatamaˈi pinepine e te feia ta ratou e here ra. Te faataa ra te tahi tia o tera hiˈopoaraa mea faufaa ia faaafaro i te fifi, ia faaea i te faahapa e ia faahau no te ore e pohe oioi.

TE PARAU RA TE BIBILIA: “O tei ore e ru i te parau, ua noaa ia ˈna te ite; e te taata i noaa ia ˈna te ite ra e aau maitai to ˈna.”—Maseli 17:27.

Ua ravehia te tahi titorotororaa i nia 564 hoa faaipoipo apî i Louisiane. Ua itehia mea pinepine aˈe te feia o tei taa e tei hoˈi faahou i to ratou apiti i te taime haamatauraa i te faataa ê i na pae matahiti matamua o to ratou faaipoiporaa. Hau atu â, e tatamaˈi pinepine aˈe ratou e eita e oaoa mau i to ratou faaipoiporaa.

TE PARAU RA TE BIBILIA: “Ta te Atua i taati ra [i roto i te faaipoiporaa], eiaha te taata e faataa ê atu.”—Mataio 19:6.