BAEBOL I TALEM WANEM
Kilim Pikinini Long Bel
Evri yia, ol woman oli stap kilim bitim 50 milian pikinini long bel. Hemia wan namba we i bigwan moa i bitim populesen blong plante kantri.
?Man i save jus no i gat rul blong folem?
?OL MAN OLI TALEM WANEM?
Ol woman oli kilim pikinini long bel from plante risen. Maet oli no gat naf mane, problem long famle, oli wantem gohed blong skul, mo oli no wantem lukaot pikinini olgeta nomo. Be, sam narafala oli ting se i no stret blong kilim pikinini long bel, from we fasin ya i soemaot se oli ting nating long wok we God i givim long ol woman blong lukaot long pikinini.
?BAEBOL I TALEM WANEM?
Long tingting blong God, laef i tabu, speseli laef blong man. (Jenesis 9:6; Ol Sam 36:9) Hemia wan stamba trutok we i halpem yumi blong save se God i tinghae long pikinini we i stap long bel blong mama. God i mekem bel blong mama, olsem wan sef ples blong pikinini i gru long hem. Wan man blong raetem Baebol i talem se: “Taem mi stap yet long bel blong mama blong mi, yu yu mekem evri haf blong bodi blong mi.” Mo hem i gohed se: “Taem mi mi no bon yet, be yu yu luk mi finis, mo olgeta dei we yu makemaot se oli blong mi, be yu raetemdaon olgeta finis long buk blong yu.”—Ol Sam 139:13, 16.
Loa we God i givim long neson blong Isrel, i soemaot tingting blong hem long saed blong pikinini we i no bon yet, mo hemia nao tingting we yumi sud folem. Loa i talem se sipos wan man i kilim wan woman we i gat bel, nao pikinini ya i ded, oli mas kilim man ya i ded blong pemaot laef blong pikinini ya. (Eksodas 21:22, 23) Long taem olsem, ol jaj oli mas tingting gud long samting we man ya i mekem mo ples we samting ya i hapen.—Namba 35:22-24, 31.
Yumi evriwan i gat wan tingting we i save jajem yumi, taem yumi mekem samting we i stret, o i no stret. Sipos wan woman we i gat bel i folemgud tingting ya we i save jajem hem, bambae hem i respektem laef blong pikinini ya, mo bambae hem i gat gudfala tingting. * Be sipos hem i go agensem tingting ya, bambae hem i save wari mo i harem nogud. (Rom 2:14, 15) Mo tu, ol ripot oli soemaot se, plante woman we oli bin kilim pikinini long bel, oli wari tumas mo oli kasem sik ya dipresen.
Yu no mas fraet o harem nogud, sipos yu gat bel be yu no bin plan from. I gud yu tingbaot promes we God i mekem long ol man we oli obei long ol rul blong hem, se: “Olgeta we oli stap obei long yu, oltaem, yu yu stap mekem i gud tumas long olgeta, mo olgeta we fasin blong olgeta i stret gud, oltaem, yu yu stap mekem i stret gud long olgeta.” (Ol Sam 18:25) Mo tu, Baebol i se: “Hae God i laekem ol fasin we i stret, mo i no save lego ol stret man ya we tingting blong olgeta i stap strong long hem.”—Ol Sam 37:28.
“Tingting blong olgeta i save agri long tok blong hem, from we samtaem oli harem long tingting blong olgeta se oli mekem i stret, mo samtaem oli harem se oli mekem i no stret.”—Rom 2:15.
?Olsem wanem sipos yu bin kilim pikinini long bel?
?OL MAN OLI TALEM WANEM?
Rut, wan singel mama i talem se: “Mi gat tri pikinini finis, mo mi harem se mi no naf blong lukaot long namba fo. Be afta we mi kilim namba fo pikinini ya long bel, mi harem se mi mekem wan samting we i nogud tumas.” * ?Olsem wanem? ?God i save fogivim hem from samting we hem i mekem?
?BAEBOL I TALEM WANEM?
Jisas Kraes i soemaot tingting we God i gat taem hem i talem se: “Mi mi no kam blong singaot olgeta we oli stret man finis, blong oli tanem tingting blong olgeta from ol sin blong olgeta. Be mi mi kam blong singaot ol man nogud, blong oli tanem tingting blong olgeta.” (Luk 5:32) Taem yumi luksave se yumi mekem wan samting we i nogud, mo yumi tanem tingting blong yumi, mo yumi askem God blong i fogivim yumi, hem i rere blong fogivim yumi, nating se sin we yumi mekem i bigwan. (Aesea 1:18) Ol Sam 51:17 i talem se: “[God i] no save tanem baksaed long man we i tanem tingting blong hem mo i putum hem i stap daon.”
God i save putum pis long tingting blong man we i mekem sin, sipos man ya i sore from samting we hem i mekem mo i prea blong God i fogivim hem. Filipae 4:6, 7 i talem se: “I gud yufala i prea long God from evri samting. Yufala i mas askem long hem, mo yufala i mas talem tangkiu tu long hem. Nao pis we hem i givim, we i bigfala moa, i bitim save blong yumi, bambae hem i putum long tingting blong yufala, blong lukaot gud long yufala.” * Rut i stadi Baebol mo hem i talemaot long God, olgeta samting we hem i bin mekem, nao hem i harem se hem i gat pis long tingting blong hem. Hem i lanem se God i rili save fogivim yumi.—Ol Sam 130:4.
“[God] i no save panisim yumi stret long mak blong ol sin blong yumi, mo hem i no save givimbak ol fasin nogud ya long yumi we yumi stap mekem long hem.”—Ol Sam 103:10.
^ par. 8 I gat sam samting we i save putum laef blong mama mo pikinini long denja, be samting ya i no givim raet long mama blong kilim pikinini long bel. Sipos wan long tufala i no save laef, man mo woman i mas mekem wan desisen, se weswan bae i laef. Long ol kantri we oli gat gudfala hospital, samting olsem i no hapen tumas.
^ par. 12 Mifala i jenisim sam nem.
^ par. 14 Hop ya blong laef bakegen i save mekem man i gat pis long tingting blong hem. Yu luk haf ya “Questions From Readers” long Wajtaoa blong 15 Eprel 2009, long Franis mo Inglis. Haf ya i tokbaot ol rul blong Baebol we i halpem yumi blong luk se maet ol pikinini we oli ded long bel oli save laef bakegen.
Maet Yu Laekem Hemia Tu
ANSA WE BAEBOL I GIVIM
?Baebol i Talem Wanem Long Saed Blong Kilim Pikinini Long Bel?
?Laef blong man i stat wetaem? ?Bambae God i save fogivim wan man we i bin kilim pikinini long bel?
