KON ANO AN GINSISIRING HAN MGA TAWO

Iba-iba an rason han kababayin-an nga nagpapapunit, upod na hito an kapobrehan, problema ha relasyon, hingyap nga magkaada kagawasan basi makatrabaho o makapadayon pag-eskwela, o basi diri magin iroy nga waray bana. Kondi para ha iba, sayop an pagpapunit—pagbalewaray ito ha obligasyon nga igintapod ha burod nga babaye.

KON ANO AN GINSISIRING HAN BIBLIA

Para ha Dios, sagrado an kinabuhi, labi na an kinabuhi han tawo. (Genesis 9:6; Salmos 36:9) Ini nga prinsipyo aplikado ha usa nga bata nga nagtutubo ha tagoangkan—an talwas nga lugar nga gindisenyo han Dios para ha iginbuburod nga minasus-an. “Imo ako gintabonan ha tiyan han akon nanay,” siring han usa nga parasurat han Biblia. Hiya nagdugang: “An imo mga mata nakakita ha akon lawas nga waray pa kahingpitan; ngan ha imo basahon an akon mga adlaw nanhibadlis.”—Salmos 139:13, 16.

An pagtagad han Dios ha kinabuhi han waray pa katatawo nga minasus-an makikita liwat ha iya Balaud ha nasud han Israel ngan ha iya iginhatag ha aton nga konsensya. An Balaud han Dios nasiring nga sisentensyahan hin kamatayon an ‘makakasabod’ hin burod, nga magigin hinungdan han kamatayon han bata ha tiyan—ibabayad han nakamatay an iya kinabuhi tungod han kinabuhi nga nawara. (Eksodo 21:22, 23) Syempre, sadang tagdon han mga hukom an motibo ngan an mga kahimtang.—Numeros 35:22-24, 31.

Dugang pa, an tawo may konsensya. Kon papamatian han usa an iya konsensya pinaagi ha pagrespeto ha kinabuhi han iya iginbuburod, tatagan hiya hito hin kamurayawan ha hunahuna. * Pero kon diri niya ito sundon, bangin samukon o kondenaron pa ngani hiya hito. (Roma 2:14, 15) Ngani, iginpapakita han mga pag-aram nga an mga nagpapapunit mas daku an posibilidad nga magkinabaraka ngan madepres.

Kondi, ano man kon baga hin makuri an pagpadaku hin anak, labi na kon waray planoha an pagburod? An Dios nagpapasarig ha mga nagkikinabuhi uyon ha iya mga suruklan: “Matinumanon ka hadton nagtutuman, hadton mga hingpit hatag mo kaupayan.” (Salmo 18:25, Maupay nga Sumat) Aton liwat mababasa: “Hi Jehova nahigugma hiton katadungan, ngan diri nagpapasibaya ha iya mga baraan.”—Salmos 37:28.

“An ira konsensya nagtitestigo liwat, ngan samtang ginhuhunahuna nira ito, gin-aakusaran o gin-aabswelto hira.”—Roma 2:15.

KON ANO AN GINSISIRING HAN MGA TAWO

Hi Ruth, usa nga solo nga nanay, nagsiring: “Tulo na an akon anak, ngan pag-abat ko diri ko na maaakos an pag-ataman hin upat. Kondi han nagpapunit ako, inabat ko nga maraot hinduro an akon ginhimo.” * Pero diri na ba hiya mapapasaylo han Dios?

KON ANO AN GINSISIRING HAN BIBLIA

Iginpakita ni Jesu-Kristo an panhunahuna han Dios han hiya nagsiring: “Kinanhi ako diri para ha magtadong, kondi para ha magpakasasala basi aghaton hira nga magbasol.” (Lucas 5:32) Oo, kon tinuod nga nagbabasol kita ha sala nga aton nahimo, ngan maghangyo ha Dios nga pasayloon kita, andam hiya ha pagpasaylo—bisan ha seryoso nga sala. (Isaias 1:18) “An ruba ngan an mabinasulon nga kasingkasing, O Dios, diri mo pagtamayon,” siring han Salmos 51:17.

Labot la han limpyo nga konsensya, gintatagan han Dios an usa nga mabinasulon hin kamurayawan ha hunahuna kon mapainubsanon nga madaop hiya ha Dios pinaagi ha pag-ampo. An Filipos 4:6, 7 nasiring: “Pinaagi han pag-ampo ngan pangamuyo nga may pagpasalamat, ipahibaro niyo ha Dios an iyo mga hangyo; ngan an kamurayawan han Dios nga labaw ha ngatanan nga pagsabot magbabantay han iyo kasingkasing ngan han iyo panhunahuna.” * Katapos mag-aram han Biblia ngan magsumat ha Dios han ngatanan, hi Ruth nagkaada hito nga kamurayawan. Hinbaroan niya nga an Dios tinuod nga nagpapasaylo.—Salmos 130:4.

“Waray niya [an Dios] pagbuhata ha aton sumala han aton mga sala, bisan pa waray bumalus sumala han aton mga karat-an.”—Salmos 103:10.