EDIWAK owo ẹnen̄ede ẹyom ndinyene eti enyịn̄. Ke ndusụk idụt, ẹkeme ndikot owo ikpe edieke enye abiatde owo enyịn̄, edide owo oro etetịn̄ m̀mê ewewet n̄kpọ abiat owo enyịn̄. Emi ikpaha nnyịn idem sia Bible ọdọhọ ete: “Ọfọn ndimek eti enyịn̄ akan ediwak inyene; ndinyene unyịme ọfọn akan silver ye gold.” (Mme N̄ke 22:1) Nso ke ikpanam man inyene eti enyịn̄, mbon en̄wen ẹnyụn̄ ẹkpono nnyịn? Nti item emi ẹkemede ndin̄wam nnyịn ẹdu ke Bible.

Ke uwụtn̄kpọ, yak ise se Bible etịn̄de ke Psalm 15. Andiwet Psalm emi okobụp ete: “Anie edidi esen ke tent [Abasi]?” Enye ọkọbọrọ ete: “Owo eke . . . anamde se inende onyụn̄ etịn̄de akpanikọ ke esịt esie. Enye idọkke edidọk. . . . Inamke nsan̄a esie baba idiọk kiet, inyụn̄ itịn̄ke ikọ esuene idian owo emi enye etịmde emehe. Enyịn esie esịn owo ekededi emi edide oburobụt owo. . . . Enye ọn̄wọn̄ọ se mîfọnke ye idemesie, edi ikpụhọkede. Enye . . . inyụn̄ ibọhọ ubọkedem.” (Psalm 15:​1-5) Ndi ukpûkponoke owo emi etiede ntem?

N̄kpọ en̄wen emi esinamde ẹkpono owo edi nsụhọdeidem. Mme N̄ke 15:33 ọdọhọ ke ‘nsụhọdeidem ebem ubọn̄ iso.’ Owo emi osụhọrede idem ọdiọn̄ọ ke enyene mme n̄kpọ emi anade imọ ikpụhọde ke uwem imọ, enye esinyụn̄ esịn ukeme ndinam oro. N̄ko, enye esikpe owo emi enye eduede ubọk. (James 3:2) Edi owo ntan̄idem itiehe ntre, enye esisọp iyatesịt. Mme N̄ke 16:18 ọdọhọ ete: “Ntan̄idem ebem nsobo iso, edu iseri onyụn̄ ebem iduọ iso.”

Edi nso ke akpanam edieke owo abiatde fi enyịn̄? Ndi ini esịt osụk ayatde fi do ke okpodomo ndinam mme owo ẹfiọk ke ẹbiat fi enyịn̄? Bụp idemfo ete, ‘Edieke nyomde ndinam mme owo ẹfiọk ke se ẹketịn̄de ẹban̄a mi idịghe akpanikọ, ndi oro idikam inamke nsu oro etetịm asuana?’ Kpa ye oro mîdiọkke ndikot owo ikpe ndusụk ini, kop se Bible ọdọhọde mi: “Kûsọp ndikot owo ikpe.” Utu ke oro, “kpe ikọ fo ye ekemmọ owo.” (Mme N̄ke 25:​8, 9) * Edieke anamde item Bible emi, ayada okụk oro akpadade okot owo ikpe do anam akpan n̄kpọ.

Bible idịghe n̄wed ikọ Abasi kpọt. Enye edi n̄wed emi etịn̄de nte ẹkpedude eti uwem. Kpukpru mbon oro ẹnamde item esie ẹnyene mme edu emi esinamde mme owo ẹkpono mmọ onyụn̄ anamde mmọ ẹnyene eti enyịn̄.