ZINA to lukumu ya mbote kele mfunu mingi yo yina na bansi ya nkaka bo kele ti bansiku yina ke taninaka yo. Bo ke taninaka yo sambu bantu kubebisa yo ve mpi kutuba ve mambu ya mbi sambu na zina yina na nzila ya mikanda to ya bimwangi-nsangu. Yo ke yibusa beto mambu yai ya bo me sonikaka banda ntama: “Zina ya mbote kele mbote kuluta kimvwama mingi; kuvanda ti luzitu kele mbote kuluta arza mpi wolo.” (Bingana 22:1) Inki mutindu beto lenda kuma ti zina ya mbote mpi kusala nde bantu kuzitisa beto? Beto lenda zwa bangindu ya mbote na Biblia.

Mu mbandu, tadila mambu yina Biblia ke tuba na Nkunga 15. Sambu na kupesa mvutu na ngiufula yai, “Nani lenda vanda munzenza na tenta” ya Nzambi?, muyimbi-bankunga sonikaka nde: “Muntu yina . . . ke salaka mambu ya mbote, mpi yina ke tubaka kieleka na ntima na yandi. Yandi ke kusilaka ve bantu makambu . . . , yandi ke sadilaka ve nkweno na yandi ata diambu mosi ya mbi, mpi yandi ke tubaka ve mambu ya luvunu sambu na banduku na yandi. Yandi ke buyaka konso muntu yina bo ke vwezaka . . . Yandi ke lungisaka lusilu na yandi, ata kana yo kele mbi sambu na yandi. . . . Mpi yandi ke ndimaka ve avoka.” (Nkunga 15:1-5) Keti nge ta zitisa ve muntu yina ke zitisaka minsiku yai ya mbote?

Kikalulu ya nkaka yina ke sadisaka sambu bantu kuzitisa beto kele kudikulumusa. Bingana 15:33 ke tuba nde: “Kudikulumusa ke vandaka na ntwala ya nkembo.” Beto tadila diambu yai: Bantu ya kudikulumusa ke monaka bisika yina bo lenda sala bansoba mpi bo ke salaka ngolo sambu na kusala bansoba yango. Diaka, bo ke vandaka ya kuyilama na kulomba pardo kana bo me pesa muntu mosi mpasi. (Yakobo 3:2) Bantu ya lulendo ke vandaka ve mutindu yina kansi bo ke sosaka kudinungisa. Bingana 16:18 ke tuba nde: “Lulendo ke vandaka na ntwala ya kubwa, mpi mpeve ya lulendo na ntwala ya kubula sakuba.”

Ebuna nki nge ta sala kana muntu mosi me bebisa zina na nge? Keti nge ta wa makasi nswalu? Kudiyula nde, ‘Ntangu mu ke sosa kunwanina zina na mu, keti yo ta sala ve nde mu mwanga luvunu yina?’ Ata bantangu ya nkaka yo lenda vanda mbote na kunata mambu yina na leta, Biblia ke pesa ndongisila yai ya mbote: “Kukwenda ve ntinu-ntinu sambu na kufunda muntu.” Kansi “samba diambu na nge ti nkweno na nge.” (Bingana 25:8, 9) * Kuyidika mambu na mawete mutindu yai lenda sadisa nge mpi na kuyonika ve mbongo na leta.

Biblia ke tubilaka ve kaka mambu ya Nzambi. Yo kele mukanda ya mbote yina ke twadisaka bantu na luzingu. Bantu yonso yina ke sadilaka mayele na yo ke yedisaka bikalulu yina ke salaka nde bantu kuzitisa bo mingi mpi yo ke sadisaka bo na kuvanda ti zina ya mbote.