Ka mohlala, ela hloko diporofeto tše di latelago tša Beibele:

• “Gobane setšhaba se tla tsogela setšhaba gomme mmušo wa tsogela mmušo; go tla ba le tlhaelelo ya dijo le ditšhišinyego tša lefase lefelong le lengwe ka morago ga le lengwe.”—Mateo 24:7.

• “Mehleng ya bofelo go tla ba le dinako tše di hlobaetšago tšeo go lego thata go lebeletšana le tšona. Gobane batho e tla ba baithati, barati ba tšhelete, ba go ikgantšha, ba ikgogomošago, barogaki, ba go se kwe batswadi, ba go se leboge, ba go se botege. Ba ba se nago lerato la tlhago, ba ba sa ikemišetšago go amogela tumelelano le ge e le efe, bathomeletši, ba se nago boitshwaro, ba bogale, ba go se rate go loka. Baeki, ba hlogothata, ba tletšego boikgantšho, ba ratago maipshino go e na le go rata Modimo.”—2 Timotheo 3:1-4.

Diporofeto tšeo di bontšha gore lefase le tloga le etšwa taolong ka tsela e makatšago le e sa laolegego. Ka tsela e itšego, se se ra gore lefase la rena le tšwile taolong, ke gore batho ga ba sa kgona go le laola. Go ya ka Beibele, batho ga ba na bohlale le matla a go tliša ditharollo tša ka mo go sa felego. Seo se bonagala gabotse Mangwalong a latelago:

• “Go na le tsela yeo motho a e bonago e lokile, eupša e feleletša ka ditsela tša lehu.”—Diema 14:12.

• “Motho [o] buša yo mongwe gore a mo gobatše.”—Mmoledi 8:9.

• “Ga go matleng a motho . . . gore a laole dikgato tša gagwe.”—Jeremia 10:23.

Ge e le gore batho ba tla tšwela pele ba dira boithatelo, go bonagala ba tla lebana le phedišo ya lefase ka moka. Eupša seo se ka se direge! Ka baka la’ng? Ka gobane Beibele e re botša gore:

• Modimo “o theile lefase godimo ga metheo ya lona; le ka se tsoge le thekesetše go iša mehleng ya neng le neng, le ka mo go sa felego.”—Psalme 104:5.

• “Moloko o a tloga gomme gwa tla o mongwe; eupša lefase le dula le le gona go iša mehleng ya neng le neng.”—Mmoledi 1:4.

• “Baloki e tla ba beng ba lefase, ba tla dula mo go lona ka mo go sa felego.”—Psalme 37:29.

•   “Go tla ba le mabele a mantši mo lefaseng; dintlheng tša dithaba go tla ba le motlalo wa mabele.”—Psalme 72:16.

Dithuto tše tša Beibele di nea dikarabo tše di kwagalago. Batho ba ka se fedišwe ke go šilafala ga tikologo, tlhaelelo ya meetse le ya dijo goba go fedišwa ke malwetši ao a aparetšego lefase. Lefase le ka se fedišwe ka ntwa ya nuclear. Ka baka la eng? Modimo ke yena a laolago bokamoso bja lefase la rena. Ke therešo gore Modimo o dumeletše batho go diriša tokologo ya bona ya boikgethelo. Lega go le bjalo, ba tla buna ditlamorago tša diphetho tša bona. (Bagalatia 6:7) Lefase la rena ga se ya pala e a leswa mo e lego gore le ka se tsoge le boetše sekeng. Modimo o dumeletše batho go ipuša go fihla bokgoleng bjo itšego.—Psalme 83:18; Baheberu 4:13.

Modimo o tlo dira se se fetago seo. O tlo dira gore batho ba ‘atelwe ke khutšo.’ (Psalme 37:11) Dilo ka moka tše dibotse tšeo go boletšwego ka tšona sehlogong se e fo ba tlhase ya bokamoso bjo bo kgahlišago bjo Dihlatse tša Jehofa tše dimilione di ithutilego ka bjona ka Beibeleng.

Dihlatse tša Jehofa ke sehlopha sa banna le basadi ba mengwaga ka moka bao ba tšwago merafong e fapafapanego. Di rapela Modimo a nnoši wa therešo yoo leina la gagwe la Jehofa le tšwelelago ka Beibeleng. Ga di boife bokamoso ka gobane Beibele e re: “Se ke seo se boletšwego ke Jehofa, Mmopi wa magodimo, Yena Modimo wa therešo, Mohlami wa lefase le Modiri wa lona, Yena yo a le theilego ka go tia, yo a sa le bopelago lefeela, yo a le hlametšego go dulwa ke batho: ‘Ke nna Jehofa, ga go na yo mongwe.’”—Jesaya 45:18.