IFYO BAIBOLO ISAMBILISHA | ISHINA LYA KWA LESA
Ishina lya kwa Lesa
Abantu abengi beta Lesa ukubomfya amalumbo pamo nga Shikulu, Uwa Muyayaya, Allah nelyo Lesa. Nomba Lesa alikwata ishina. Bushe mulingile ukulalibomfya?
Bushe Lesa ni nani ishina?
IFYO ABANTU BALANDA
Abantu abengi abatila Bena Kristu, baishiba ukuti ishina lya kwa Lesa, ni Yesu. Bambi nabo batila apo kwaba fye Lesa Wa Maka Yonse umo, tabafwile ukulabomfya ishina lyakwe. Na kabili, bambi balanda ukuti ishina lya kwa Lesa talyalinga ukulibomfya.
IFYO BAIBOLO ILANDA
Apo Yesu te Lesa Wa Maka Yonse, te kuti tulande ukuti Yesu e shina lya kwa Lesa Wa Maka Yonse. Na kuba, Yesu asambilishe abasambi bakwe ukulapepa kuli Lesa ati: “Mwe Shifwe, ishina lyenu libe ilya mushilo.” (Luka 11:2) Na kabili, Yesu umwine apepele kuli Lesa ati: “Tata, cindikeni ishina lyenu.”—Yohane 12:28.
Lesa alilanda muli Baibolo ukuti: “Nine Yehova. Ilyo e shina lyandi; nshakapeele ubukata bwandi kuli umbi.” (Esaya 42:8) Ishina lya Cibemba ilya kuti “Yehova” lyafuma ku filembo 4 ifya ciHebere, YHWH, ifimininako ishina lya mushilo ilya kwa Lesa. Ili ishina lisangwa imiku 7,000 mu Malembo ya ciHebere. * Imiku ili ishina lisangwa muli aya Malembo yalicila imiku iyo amalumbo pamo nga “Lesa,” “Uwa Maka Yonse,” nelyo “Shikulu” yasangwamo, kabili yalicila fye ne miku amashina pamo nga Abrahamu, Mose e lyo na Davidi yasangwamo.
Takwaba mu Baibolo apo Yehova akaanya ukubomfya ishina lyakwe mu mucinshi. Amalembo yalanda ukuti ababomfi ba kwa Lesa balitemenwe ukubomfya ishina lya kwa Lesa. Na kuba, lyalesangwa na mu mashina ayo baleinika abana babo pamo nga Eliya, ilipilibula ukuti “Yehova E Lesa Wandi,” na Sekaria ilipilibula ukuti “Yehova Nanjibukisha.” Na kabili balebomfya ishina lya kwa Lesa na lintu fye balelanshanya.—Ruti 2:4.
Lesa afwaya ukuti tulebomfya ishina lyakwe. Baibolo itweba ukuti: “Tooteleni Yehova, lilileni kwi shina lyakwe.” (Amalumbo 105:1) Lesa alabika na mano ku bantu ‘abatontonkanya pe shina lyakwe.’—Malaki 3:16.
“Pa kuti abantu beshibe ukuti imwe mweka, mwe bakwata ishina lya kuti Yehova, Ni mwe Mwapulamo pano isonde ponse.”—Amalumbo 83:18.
Bushe ishina lya kwa Lesa lyalola mwi?
Abantu bamo abasambilila sana batila mu ciHebere ishina lya kuti Yehova lipilibula ukuti “E Ulenga Ifintu Ukubako.” Ili ishina lyalola mu kutila Lesa kuti ailenga nelyo ukulenga ifibumbwa fyakwe ukuba ifyo alefwaya pa kuti afikilishe ubufwayo bwakwe. Kabumba wakwatisha amaka e wingakwata fye ishina lya musango uyu.
IFYO MWINGANONKELAMO
Ukwishiba ishina lya kwa Lesa kuti kwayalula ifyo mutontonkanya pali ena. Kuti kwalenga mwapalama sana kuli ena. Na kuba, te kuti mupalame ku muntu uo mushaishiba ishina. Kanshi apo Lesa alimweba ishina lyakwe, afwaya ukuti mupalame kuli ena.—Yakobo 4:8.
Mulingile ukucetekela ukutila Lesa kuti acita ifyo alaya, pantu na kuba e bupilibulo bwe shina lyakwe. Baibolo itila: “Abaishiba ishina lyenu bakamutetekela.” (Amalumbo 9:10) Mukacetekela sana Lesa nga mwasambilila ukuti ishina lyakwe lyalyampana sana ne mibele akwata pamo nga icikuuku, uluse, umutembo, no mulinganya. (Ukufuma 34:5-7) Tulaba ne nsansa ukwishiba ukuti Yehova lyonse alafikilisha ifyo atulaya, kabili te kuti acite ifintu ifyapusana ne mibele akwata.
Ala lishuko sana ukwishiba ishina lya kwa Lesa Wa Maka Yonse. Nga mwaishiba ishina lyakwe, kuti mwapaalwa pali ino nshita e lyo na ku ntanshi. Lesa alilaya ukuti: “Nkamucingilila pantu alishiba ishina lyandi.”—Amalumbo 91:14.
“Onse uwalilila kwi shina lya kwa Yehova akapusuka.”—Yoele 2:32.
Ishina lya kwa Lesa mu ndimi ishalekanalekana
^ para. 9 Mu maBaibolo ayengi balifumyamo ishina lya kwa Lesa no kubikamo ilumbo lya kuti “SHIKULU” mu filembo ifikalamba, e lyo mu maBaibolo yambi ishina lya kwa Lesa lisangwa fye mu fikomo fimo fimo nelyo mu mafutunoti. Lelo muli Baibolo ya Amalembo ya Calo Cipya mwaliba ishina lya kwa Lesa monse umo lifwile ukuba.
Nalimo Kuti Mwatemwako ne fi
AMASAMBILISHO YA MU BAIBO AYACINDAMA
Bushe Lesa Alikwata Ishina?
Lesa alikwata amalumbo ayengi pamo nga Uwa Maka Yonse, Kabumba, na Shikulu. Lelo Lesa alikwata ishina ilyo balemba imiku 7,000 mu Baibolo.
AMASUKO KU MEPUSHO YA MU BAIBOLO
Bushe Ishina lya kwa Lesa ni Yesu?
Yesu talandilepo ati ali ni Lesa Wa Maka Yonse. Mulandu nshi?
AMASUKO KU MEPUSHO YA MU BAIBOLO
Bushe Yesu ni Lesa Wa Maka Yonse?
Bushe Yesu alandilepo shani pa fyo alemona Lesa?
