?OL MAN OLI TALEM WANEM?

Plante man we oli talem se oli Kristin, oli bilif se nem blong God hem i Jisas. Samfala oli talem se i no nid blong singaot God long nem blong hem, from we i gat wan God nomo we i gat olgeta paoa. Mo sam narafala oli talem se i no stret blong singaot God long prapa nem blong hem.

?BAEBOL I TALEM WANEM?

Nem blong God i no Jisas, from we Jisas i no God ya we i gat olgeta paoa. Jisas i tijim ol man blong oli prea se: “Papa, plis yu mekem nem blong yu i tabu.” (Luk 11:2) Mo Jisas hem wan i prea long God se: “Papa, yu leftemap nem blong yu.”—Jon 12:28.

Long Baebol, God i talem se: “!Mi mi Jehova! !Hemia nao nem blong mi! Ol man oli no mas leftemap nem blong wan narafala god.” (Aesea 42:8, NW) Fofala leta ya YHWH long Hibru oli soemaot nem blong God, “Jehova.” Nem ya i kamaot 7,000 taem long Hibru haf blong Baebol. * Oli yusum nem ya plante moa taem i bitim ol taetel olsem “God,” “God ya we i gat olgeta paoa,” o “Masta,” mo ol nem olsem Ebraham, Moses, mo Deved.

I no gat wan ples long Baebol we Jehova i talem se ol man oli no mas yusum nem blong hem. Ol man blong God long Baebol oli yusum nem blong hem oltaem. Oli joenem nem ya wetem nem blong ol pikinini blong olgeta, olsem Elaeja, we i min se “God Blong Mi Jehova,” mo Sekaraea, we i min se “Jehova i Tingbaot.” Mo oli yusum nem blong God tu long ol storian blong olgeta evri dei.—Rut 2:4, NW.

God i wantem we yumi yusum nem blong hem. Baebol i talem se: “!Yumi talem tangkiu long Jehova! !Yumi talemaot hae nem blong hem!” (Ol Sam 105:1, NW) Mo tu, Jehova i glad long olgeta we oli stap “tingting dip long nem blong hem.”—Malakae 3:16, NW.

Sam man blong hae save oli talem se long Hibru, nem ya Jehova i min se “Hem i Mekem i Kamaot.” Mining ya i soemaot se God i save mekem hem wan, ol man, mo ol narafala samting we hem i wokem, oli kam olsem we hem i wantem, blong mekem stamba tingting blong hem i kamtru. God ya we i wokem olgeta samting mo i gat olgeta paoa, hem nomo i save mekem mining blong nem ya i kamtru.

?I MEKEM WANEM LONG YU?

Taem yu save nem blong God, tingting we yu gat long hem i jenis, mo yu harem se i moa isi blong kam klosap long hem. Traem tingbaot: ?Olsem wanem yu save kam klosap long wan man we yu no save nem blong hem? God i talemaot nem blong hem, hemia i soemaot se hem i wantem we yu kam klosap long hem.—Jemes 4:8.

Yu save sua se oltaem Jehova bambae i mekem ol promes blong hem oli kamtru, olsem we nem blong hem i soemaot. Hemia nao from wanem Baebol i talem se: “Olgeta we oli save nem blong yu, oli trastem yu.” (Ol Sam 9:10, NW) Taem yu kasem save se ol gudfala fasin blong Jehova olsem lav, sore, mo stret fasin, oli joen wetem nem blong hem, yu trastem hem. (Eksodas 34:5-7) I gud tumas blong save se oltaem Jehova i stap holem ol promes blong hem, mo hem i no save lego ol gudfala fasin blong hem.

I wan bigfala ona blong save nem blong God ya we i gat olgeta paoa. Hemia i save mekem yumi kasem ol nambawan blesing naoia, mo long fiuja. God i promes se: “Bambae mi protektem hem, from we hem i save nem blong mi.”—Ol Sam 91:14, NW.

“Olgeta man we oli singaot mi long nem blong mi [“Jehova,” NW], mi bambae mi sevem olgeta.”—Joel 2:32.