ANG GINASILING SANG IBAN

Madamo sa nagapangangkon nga mga Cristiano ang nagapati nga Jesus ang ngalan sang Dios. Ang iban nagasiling nga bangod isa lamang ang Labing Gamhanan nga Dios, indi na kinahanglan nga gamiton ang iya personal nga ngalan. Ang iban naman nagainsister nga indi nagakaigo nga gamiton ang personal nga ngalan sang Dios.

ANG GINASILING SANG BIBLIA

Indi Jesus ang ngalan sang Labing Gamhanan nga Dios, kay si Jesus indi Dios nga Labing Gamhanan. Ang matuod, gintudluan ni Jesus ang iya masigkasumilimba nga mangamuyo sa Dios nga nagasiling: “Amay, pakabalaanon ang imo ngalan.” (Lucas 11:2) Si Jesus mismo nangamuyo sa Dios: “Amay, himayaa ang imo ngalan.”—Juan 12:28.

Sa Biblia, nagsiling ang Dios: “Ako si Jehova. Amo ina ang akon ngalan; indi ko pag-ihatag ang akon himaya sa iban.” (Isaias 42:8) Ang “Jehova” amo ang Hiligaynon nga badbad sang apat ka Hebreo nga letra nga YHWH, nga nagarepresentar sa ngalan sang Dios. Ina nga ngalan makita sing sobra 7,000 ka beses sa Hebreong Kasulatan. * Mas madamo ini sangsa mga titulo, pareho sang “Dios,” “Labing Gamhanan,” ukon “Ginuo,” kag mas pirme ini ginasambit sangsa iban nga ngalan, pareho sang Abraham, Moises, ukon David.

Wala kita sing mabasa sa Biblia nga gindumilian ni Jehova ang matinahuron nga paggamit sang iya ngalan. Sa baylo, ginapakita sang Kasulatan nga ginagamit sang mga alagad sang Dios sang una ang ngalan sang Dios. Ginlakip nila ini sa mga ngalan sang ila kabataan, pareho sang Elias, nga nagakahulugan sing “Ang Akon Dios si Jehova,” kag Zacarias, nga buot silingon “Gindumdom ni Jehova.” Kag wala sila nagapangalag-ag sa paggamit sang ngalan sang Dios sa ila mga pag-istoryahanay.—Rut 2:4.

Gusto sang Dios nga gamiton naton ang iya ngalan. Ginapalig-on kita nga ‘magpasalamat kay Jehova, kag magpanawag sa iya ngalan.’ (Salmo 105:1) Nalipay pa gani sia “sa mga nagapamalandong sa iya ngalan.”—Malaquias 3:16.

Nagapati ang pila ka iskolar nga ang Hebreo nga ngalan sang Dios nga Jehova nagakahulugan sing “Ginapahanabo Niya nga Mangin Amo.” Ginapakita sini nga mapahanabo sang Dios sa iya kaugalingon ukon sa iya mga tinuga ang bisan ano para matuman ang iya kabubut-on. Ang labing gamhanan nga Manunuga lamang ang makahimo sina.

ANG EPEKTO SINI SA IMO

Ang paghibalo sang ngalan sang Dios magapabag-o sang imo pagtan-aw sa iya. Mangin mas mahapos sa imo ang pagpakigsuod sa iya. Kay man, paano ka mangin suod sa isa kon wala ka nakahibalo sang iya ngalan? Ang pagpakilala sang Dios sang iya ngalan nagapamatuod nga gusto niya nga mangin suod ka sa iya.—Santiago 4:8.

Makasalig ka gid nga tumanon ni Jehova ang kahulugan sang iya ngalan, bilang Dios nga nagatuman sang iya mga promisa. Amo kon ngaa ang Biblia nagasiling: “Ang mga nakakilala sang imo ngalan magasalig sa imo.” (Salmo 9:10) Magabakod pa gid ang imo pagsalig sa iya samtang ginatun-an mo nga ang ngalan sang Dios naangot sa iya mga kinaiya, pareho sang gugma, kaluoy, pagkamainawaon, kag hustisya. (Exodo 34:5-7) Makapabakod mahibaluan nga samtang ginatuman gid ni Jehova ang iya mga promisa, pirme gid ini nahisanto sa iya mga kinaiya.

Maathag nga ang paghibalo sa ngalan sang Labing Gamhanan nga Dios isa gid ka pribilehiyo. Magahatag ini sa imo sing mga pagpakamaayo subong kag sa palaabuton. Ang Dios nagpromisa: “Amligan ko sia bangod kilala niya ang akon ngalan.”—Salmo 91:14.

“Ang tagsatagsa nga nagatawag sa ngalan ni Jehova maluwas.”—Joel 2:32.