TI KUNA TI DADDUMA

Adu nga agkunkuna a Kristiano ti mamati a Jesus ti nagan ti Dios. Dadduma ti mangibaga a maymaysa ti Mannakabalin-amin a Dios, isu a saanen a kasapulan ti panangusar iti personal a naganna. Adda met latta dagiti mangipapilit a saan a maitutop ti panangusar iti nagan ti Dios.

TI KUNA TI BIBLIA

Saan a Jesus ti nagan ti Mannakabalin-amin a Dios ta saan met a ni Jesus ti Dios a Mannakabalin-amin. Kinapudnona, insuro ni Jesus kadagiti padana nga agdaydayaw nga ikararagda iti Dios: “Ama, masantipikar koma ti naganmo.” (Lucas 11:2) Inkararag a mismo ni Jesus iti Dios: “Ama, padayagem ta naganmo.”—Juan 12:28.

Iti Biblia, indeklara ti Dios: “Siak ni Jehova. Dayta ti naganko; ket iti asinoman a sabali saanko nga ited ti bukodko a dayag.” (Isaias 42:8) “Jehova” ti Iloko a patarus ti uppat a Hebreo a letra a YHWH, a mangirepresentar iti nagan ti Dios. Agparang dayta a nagan iti agarup mamin-7,000 iti Hebreo a Kasuratan. * Ad-adu dayta ngem iti aniaman a titulo a kas iti “Dios,” “Mannakabalin-amin,” wenno “Apo,” ken ad-adu a daras a nagparang ngem iti aniaman a sabali pay a nagan a kas iti Abraham, Moises, wenno David.

Awan ti mabasatayo iti Biblia nga imparit ni Jehova ti nadayaw a panangusar iti naganna. Ipakitana ketdi a nawaya idi nga us-usaren dagiti adipen ti Dios ti naganna. Inramanda dayta kadagiti impanaganda iti annakda a kas iti Elias, kayatna a sawen, “Ni Jehova ti Diosko,” ken Zacarias, kayatna a sawen, “Linagip ni Jehova.” Ken saanda nga agduadua a mangusar iti nagan ti Dios iti inaldaw a panagsasaritada.—Ruth 2:4.

Kayat ti Dios nga usarentayo ti naganna. Maisingsingasing nga ‘agyamantayo ken Jehova, umawagtayo iti naganna.’ (Salmo 105:1) Maragsakan ken sipapanunot pay ketdi ti Dios kadagidiay “mangpampanunot iti naganna.”—Malakias 3:16.

Mamati ti dadduma nga eskolar nga iti Hebreo, “Pagbalinenna” ti kaipapanan ti Jehova. Ipakita dayta a kabaelan ti Dios a pagbalinen ti bagina wenno dagiti parsuana iti aniaman a kasapulan tapno maibanag ti pagayatanna. Ti laeng mannakabalin-amin a Namarsua ti makatungpal iti kaipapanan dayta a nagan.

TI KAIPAPANANNA KENKA

No maammuam ti nagan ti Dios, agbaliw ti kapanunotam kenkuana. Nalaklakanton para kenka ti umasideg kenkuana. Ngamin, kasano koma nga agbalinka a nadekket iti maysa no saanmo nga ammo ti naganna? Dayta ti rason nga impakaammo ti Dios ti naganna kenka—kayatna nga agbalinka a nadekket kenkuana.—Santiago 4:8.

Masiguradom a kanayon a tungpalen ni Jehova ti kaipapanan ti naganna kas Dios a mamagbalin a posible ti amin a bambanag. Isu a kuna ti Biblia: “Agtalekto kenka dagidiay makaam-ammo iti naganmo.” (Salmo 9:10) Maaddaanka iti kasta a panagtalek no maammuam a kanayon a konektado ti nagan ni Jehova kadagiti kualidadna, kas iti napudno nga ayat, asi, kinamannakipagrikna, ken kinahustisia. (Exodo 34:5-7) Nagsayaat a maammuan a kanayon a tungpalen ni Jehova dagiti karina ken saan a pulos nga agaramid iti banag a maikontra kadagiti kualidadna.

Nalawag a maysa a pribilehio ti pannakaammo iti nagan ti Mannakabalin-amin a Dios. Mangyeg dayta kadagiti bendision ita ken iti masanguanan. Ikarkari ti Dios: “Salaknibakto agsipud ta naammuanna ti naganko.”—Salmo 91:14.

“Tunggal maysa nga umawag iti nagan ni Jehova makatalawto a sitatalged.”—Joel 2:32.