DIBANZA YA BIBLIA
Zina ya Nzambi
Ntangu bantu mingi ke sambaka Nzambi, bo ke sadilaka batitre yina ke monisaka luzitu, mu mbandu Mfumu, Allah to Nzambi. Ata mpidina, Nzambi kele ti zina. Keti nge ta zola kusadila zina yango?
Zina ya Nzambi kele nani?
MAMBU YINA BANTU YA NKAKA KE TUBAKA
Bantu mingi yina ke tubaka nde bo kele Bakristu ke kwikilaka nde Yezu kele zina ya Nzambi. Bantu ya nkaka ke tubaka nde sambu Nzambi Nkwa-Ngolo Yonso kele kaka mosi, kusadila zina na yandi kele mfunu ve. Diaka, bankaka ke tubaka nde yo me fwana ve na kusadila zina ya Nzambi.
MAMBU YINA BIBLIA KE TUBAKA
Yezu kele ve zina ya Nzambi Nkwa-Ngolo Yonso, sambu Yezu kele ve Nzambi Nkwa-Ngolo Yonso. Ya kieleka, Yezu longaka balongoki na yandi na kusamba Nzambi nde: “Tata, zina na nge kuvanda ya santu.” (Luka 11:2) Yezu yandi mosi sambaka Nzambi nde: “Tata, pesa zina na nge nkembo.”—Yoane 12:28.
Nzambi ke tuba na Biblia nde: “Mono kele Yehowa. Yo yina zina na mono; mono ke pesaka ve nkembo na mono na muntu ya nkaka.” (Yezaya 42:8) “Yehowa” kele mutindu bo ke balulaka na Kikongo bisono iya ya Kiebreo YHWH, yina ke monisaka zina ya Nzambi. Masonuku ya Kibreo, * ke sadilaka zina yai kiteso ya mbala 7 000. Bo ke sadilaka zina yai mingi kuluta konso titre yina, mu mbandu “Nzambi,” “Nkwa-Ngolo Yonso,” to “Mfumu,” mpi kuluta bazina yonso ya nkaka, mu mbandu Abrahami, Moize, to Davidi.
Kele ve ti kisika mosi na Biblia yina Yehowa ke buyisaka kusadila zina na yandi na luzitu yonso. Kansi, Biblia ke monisaka nde bansadi ya Nzambi vandaka kusadila mingi zina ya Nzambi. Bo vandaka kusadila yo na bantendula ya bazina yina bo vandaka kupesa bana na bo, mu mbandu Eliya yina ke tendula “Yehowa Kele Nzambi na Mono,” Zekaria disongidila “Yehowa Me Yibuka.” Diaka, bo vandaka ve ti badute na kusadila zina ya Nzambi na masolo na bo ya konso kilumbu.—Ruti 2:4.
Nzambi ke zolaka nde beto sadila zina na yandi. Biblia ke siamisaka beto na kupesa “Yehowa matondo” mpi kubinga “zina na yandi.” (Nkunga 105:1) Nkutu yandi ke sepelaka kusonika bazina ya bantu yina “ke yindululaka zina na yandi.”—Malaki 3:16.
“Bika bantu kuzaba nde nge, yina zina na nge kele Yehowa, nge mpamba kele muntu ya Kuluta Zulu na ntoto ya mvimba.”—Nkunga 83:18.
Zina ya Nzambi ke tendula nki?
Bantu ya nkaka ya mayele ke tubaka nde zina ya Yehowa na Kiebreo ke tendula nde “Yandi Ke Kumaka.” Ntendula yai ke monisa nde Nzambi lenda kuma konso kima yina yandi ke zola to kusadila lugangu na yandi sambu na kulungisa luzolo na yandi. Ngangi nkwa-ngolo yonso mpamba me fwana na kubaka zina yai.
MAMBU YINA YO KE TENDULA SAMBU NA NGE
Kuzaba zina ya Nzambi ta sadisa na kusoba mutindu nge ke tadilaka yandi. Yo ta sadisa nge mpi na kukuma nduku na yandi. Ebuna, nki mutindu nge lenda kuma nduku ya muntu yina nge me zaba ve zina? Sambu Nzambi me songaka nge zina na yandi, yo ke monisa nde yandi ke zolaka nde nge kuma nduku na yandi.—Yakobo 4:8.
Vanda ti kivuvu nde Yehowa ta sala mambu na kuwakana ti zina na yandi, disongidila yandi ta lungisa ntangu yonso balusilu na yandi. Yo yina, Biblia ke tuba nde: “Bantu yina me zaba zina na nge ta tudila nge ntima.” (Nkunga 9:10) Nge ta yedisa bikalulu yai ntangu nge ke zaba nde bikalulu na yandi, mu mbandu zola ya kwikama, mawa, nkenda, mpi lunungu ke pusaka yandi na kusala mambu. (Kubasika 34:5-7) Yo kele kiese na kuzaba nde Yehowa ta lungisa kaka balusilu na yandi, yandi ta sala ve ata fioti mambu yina ke wakana ve ti bikalulu na yandi.
Ya kieleka, kuzaba zina ya Nzambi Nkwa-Ngolo Yonso kele dibaku ya nene. Yo lenda natila nge balusakumunu mingi banda bubu mpi na bilumbu ke kwisa. Nzambi ke sila nde: “Mono ta tanina yandi sambu yandi me zaba zina na mono.”—Nkunga 91:14.
“Konso muntu yina ke binga zina ya Yehowa ta guluka.”—Yoele 2:32.
Zina ya Nzambi kele na bandinga mingi
^ par. 9 Bambalula mingi ya Biblia ke katulaka zina ya Nzambi mpi ke yingisaka yo na titre “MFUMU” yina bo ke sonikaka na bisono ya nene, kansi bankaka ke tulaka zina ya Nzambi kaka na baverse yina bo me pona to na banoti na nsi ya lutiti. Biblia—Mbalula ya Nsi-Ntoto ya Mpa ke sadilaka mingi zina ya Nzambi.
Nge Lenda Sepela Mpi Ti
MALONGI YA MFUNU YA BIBLIA
Keti Nzambi Kele na Zina?
Nzambi kele ti batitre mingi, tanga mpi Nkwa-Ngolo Yonso, Ngangi, mpi Mfumu. Kansi, bo ke sadila zina ya Nzambi mbala kiteso ya 7 000 na Biblia.
