ҺЬНӘ МӘРЬВ ЧЬ ДЬБЕЖЬН

Гәләк Мәсиһи баԝәр дькьн кӧ наве Хԝәде Иса йә. Йед дьн жи дьбежьн кӧ рʹаст ә Хԝәдайе Һʹьмзор йәк ә, ле нә һʹәԝщә йә наве ԝи бьдьнә хәбате. Һәнә йед ӧса жи, кӧ дьбежьн ԝәки нәбаш ә наве Хԝәде бьдьнә хәбате.

КʹЬТЕБА ПИРОЗ ЧЬ ДЬБЕЖӘ

Наве Хԝәдайе Һьмзор Иса нинә, чьмки Иса Хԝәдайе Һьмзор нинә. Бь рʹасти Иса пәйчуйед хԝә һин дькьр Хԝәдерʹа ӧса дӧа бькьн: «Баво, Наве тә пироз бә» (Луԛа 11:2). Иса хԝәха жи ӧса Хԝәдерʹа дӧа дькьр: «Баво, наве хԝә бьльнд кә (Йуһәнна 12:28).

Дь Кʹьтеба Пирозда Хԝәде дьбежә: «Әз Хӧдан ьм [Йаһоԝа, ДТʹ], наве мьн әԝ ә у әзе рʹумәта хԝә нәдьм йәки дьн у пәсьне хԝә нәдьм пʹутед ԛәԝарти» (Ишайа 42:8). Наве «Йаһоԝа» те һьлдане жь чар һәрфед Ибранийә ЙҺԜҺ, кӧ те һʹәсабе наве Хԝәде. Әв нав дь Ньвисаред Ибранида, йе кӧ ӧса жи ча Пәймана Кәвьн әʹйан ә, ԝәкә 7 000 щар те дитьне. *[5] Әв дьһа зедә те дитьне, нә кӧ һʹәму сәрнавед дьн ча «Хԝәде», «Һьмзор», йан «Хӧдан». Әв жь навед ӧса жи, ча Бьраһим, Муса у Даԝьд, даһа гәләк щар те дитьне.

Тʹӧ щийа дь Кʹьтеба Пирозда Йаһоԝа ԛәдәхә накә кӧ наве ԝи бь ԛәдьр бьдьнә хәбате. Ле дәԝсе Ньвисаред Пироз әʹйан дькьн, ԝәки хьзмәткʹаред Хԝәде бь сәрбәстийе әв нав дьданә хәбате. Әв нав ӧса жи хӧйа дьбу һьнә навада йед кӧ де-бав зарʹед хԝәрʹа дьдан. Мәсәлә наве Елйас, чь кӧ те һʹәсабе «Хԝәдайе мьн Йаһоԝа йә», у Зәкәрйа чь кӧ те һʹәсабе «Йаһоԝа Кьрә Бира Хԝә». Демәк әԝана бь азайи әв нав хәбәрдана һәр рʹожида жи дьданә хәбате (Рутʹ 2:4).

Хԝәде дьхԝазә кӧ әм наве ԝи бьдьнә хәбате. Мәрʹа һатийә готьне «Жь Йаһоԝа рʹази бьн, наве Ԝи һьлдьн» (Зәбур 105:1, ДТʹ). Һәла һе мәрьвед кӧ сәр «наве ԝи дьфькьрьн» бәр чʹәʹве Хԝәде ԛәбул ьн (Малахи 3:16).

Һьнә зандар дьбежьн, ԝәки бь Ибрани наве Йаһоԝа, те һʹәсабе «Әԝ Пек Тинә». Әв йәк әʹйан дькә кӧ Хԝәде дькарә һьм хԝә у һьм жи әʹфринед хԝә бькә әԝ чь кӧ әԝ дьхԝазә, сәва кӧ ԛьрара хԝә бинә сери. Тʹәне Әʹфьрандаре һʹьмзор һежайи ви нави йә.

ӘВ ЧЬ ТЕ ҺʹӘСАБЕ БОНА ТӘ?

Занәбуна наве Хԝәде ԝе ньһерʹандьна тә дәрһәԛа ԝи бьгӧһезә. Те бьвини кӧ чьԛас һеса йә незики ԝи би. Һәмьки те чаԝа бькарьби незики кәсәки би һәрге наве ԝи ньзани? Әв кӧ Хԝәде наве хԝә мәрʹа әʹйан кьрийә, дьдә кʹьфше, ԝәки әԝ дьхԝазә кӧ тӧ незики ԝи би (Аԛуб 4:8).

Тӧ дькари баԝәр би, кӧ Йаһоԝа ԝе тʹьме ль гора наве хԝә бькә, чьмки әԝ һәйә Хԝәдайе кӧ тʹьме созед хԝә пек тинә. Ләма жи Кʹьтеба Пироз дьбежә «кәсед кӧ Наве тә нас дькьн, ль тә әԝлә нә» (Зәбур 9:10). Чахе тӧ пебьһʹәси кӧ наве Йаһоԝа хәйсәтед ԝива гьредайи йә, мәсәлә һʹьзкьрьн, дьлрʹәми, мәрʹдани у һәԛи, һьнге итʹбарийа тә һьндава ԝида ԝе һе мәзьн бә (Дәркʹәтьн 34:5-7). Бь рʹасти жи ча дьлрʹьһʹәт дькә занәбуна ԝе йәке, кӧ Йаһоԝа ԝе тʹьме хԝәйе созе хԝә бә, у әԝе тʹӧ щар мьԛабьли хәйсәтед хԝә ԝе тьштәк нәкә.

Ԛәдьрәки пʹьрʹ мәзьн ә наве Хԝәдейи Һʹьмзор бьзаньбьн. Әв йәк дькарә мәщале тәрʹа бьдә кӧ чаԝа ньһа ӧса жи ль ахьрийе, кʹәрәмед һәрһәйи бьстини. Хԝәде соз дьдә: «Әзе пьштоване ԝи бьм, чьмки наве Мьн нас дькә» (Зәбур 91:14).

«Һәр ки банги наве Хӧдан бькә ԝе хәлас бьбә» (Йоԝел 2:32).