VYUMA VEJI KUHANJIKANGA VATU

Vatu vavavulu vaze valivuluka kupwa vaka-Kulishitu vafwelela ngwavo Kalunga lijina lyenyi ikiye Yesu. Veka vashinganyeka ngwavo hakuwana nge kwatwama Kalunga Wangolo Josena umwe kaha, ngocho katwatela kuzachisanga lijina lyenyiko. Kaha nawa veka veji kwambanga ngwavo kachapwa chakutamo kuzachisa lijina lyaKalungako.

VYUMA YAHANJIKA MBIMBILIYA

Hakuwana nge Yesu kapwa Kalunga Wangolo Josenako, ngocho lijina lyaKalunga keshi ikiye Yesuko. Echi chikiko chalingishile Yesu alweze vaka-Kulishitu valombenga kuli Kalunga ngwavo: “Ove Setu, lijina lyove lipwenga lyajila.” (Luka 11:2) Yesu alombele kuli Kalunga ngwenyi: “Ove Tata, tohwesa lijina lyove.”—Yowano 12:28.

Kalunga ahanjika muMbimbiliya ngwenyi: “Ami yami Yehova. Eli likiko lijina lyami. Kangweshi kuhana upahu wami kuli mutu wekako.” (Isaya 42:8) Lijina Yehova valyalumuna muChingeleshi kufuma kuvasona vawana vamuchiHepeleu YHWH vaze vemanyinako lijina lyaKalunga. Lijina kana lyasoloka mapapa kafwe 7,000 muVisoneka VyachiHepeleu. * Valizachisa chikuma kuhambakana jivulukiso jakufwana nge “Kalunga” chipwe “Wangolo Josena,” chipwe “Mwata,” namajina akufwana nge Apalahama, naMose, naNdavichi.

Mbimbiliya kayasolola numba nge vatu kavatela kuzachisa lijina lyaYehovako. Oloze Visoneka vyasolola nge lijina lyaKalunga valizachishilenga chikuma kuvangamba jaKalunga vakushikulu. Vazachishilenga lijina kana hakuluka vana vavo majina akufwana nge Elija kulumbununa “Yehova Ikiye Kalunga Kami” naZekaliya kulumbununa “Yehova Nanuka.” Kaha nawa vazachishilenga lijina kana namukushimutwila chavo.—Lute 2:4.

Kalunga asaka tuzachisenga lijina lyenyi. Tuvosena twatela ‘kusakwilila Yehova, nakumusanyika halijina lyenyi.” (Samu 105:1) Kalunga eji kumonanga ‘vaze veji kushinganyekanga halijina lyenyi.’—Malaki 3:16.

Vatu vamwe vaze valinangula chikuma vafwelela ngwavo muchiHepeleu lijina lyaYehova lyalumbununa nge “Eji Kulingisanga Vyuma Kupwako.” Ulumbunwiso kana wasolola nge Kalunga nahase kulingisa vyuma kupwako chipwe kulingisanga vyuma atenga vilinge mweshomwo nasake mangana atesemo vyuma ajina. Chikupu vene, Kalunga wangolo josena ikiye kaha nahase kuliluka lijina kaneli.

OMWO CHALUMBUNUKILA KULI ENU

Kutachikiza lijina lyaKalunga nachimikafwa mumutachikize kanawa. Kulinga ngocho nachimikafwa mupandame kuli ikiye. Uno namuhasa kupandama ngachilihi kumutu uze kamwatachikiza lijinako? Hakuwana nge Kalunga amilweza lijina lyenyi, ngocho ali nakusaka mupandame chikuma kuli ikiye.—WaYakova 4:8.

Mwatela kufwelela chikupu ngwenu Yehova mwatesangamo vyuma ajina kweseka naulumbunwiso walijina lyenyi. Evi vikiko Mbimbiliya yahanjikila ngwayo: “Vaze vatachikiza lijina lyove navafwelelanga muli ove.” (Samu 9:10) Munahase kufwelela Yehova kachi nge namulinangula vyalijina lyenyi navilinga vyenyi vyakufwana nge zangi yakwilila, nakeke, nakutetela, nachiyulo. (Kulovoka 34:5-7) Tweji kwivwanga kuwaha chikuma hakutachikiza ngwetu Yehova mwatwalangaho lika kulama jishiko jenyi.

Chikupu vene, kutachikiza lijina lyaKalunga Wangolo Josena chapwa hikutokwa chachinene. Kahechi nachimilingisa mupwenga vakutokwa oholyapwa nakulutwe nawa. Kalunga ashika ngwenyi: “Nangumukinga mwomwo atachikiza lijina lyami.”—Samu 91:14.

“Weshowo mwasanyika halijina lyaYehova navakamulwila.”—Yowele 2:32.