SEO BATHO BA BANGWE BA SE BOLELAGO

Batho ba bantši bao ba ipolelago gore ke Bakriste ba dumela gore leina la Modimo ke Jesu. Ba bangwe ba bolela gore ka ge go na le Modimo a nnoši yo e lego Ramatlaohle, ga go hlokagale go diriša leina la gagwe. Ba bangwe gape ba bolela gore ke mo go sa swanelago go diriša leina la Madimo.

SEO BEIBELE E SE BOLELAGO

Leina la Modimo Ramatlaohle ga se Jesu, ka gobane Jesu ga se Modimo Ramatlaohle. Ge e le gabotse, Jesu o rutile balatedi ba gagwe gore ge ba rapela Modimo ba re: “Tate, leina la gago a le kgethagatšwe.” (Luka 11:2) Jesu ka boyena o ile a rapela Modimo a re: “Tate tagafatša leina la gago.”—Johane 12:28.

Ka Beibeleng, Modimo o re: “Ke nna Jehofa. Ke lona leina la ka; nka se nee yo mongwe letago la ka.” (Jesaya 42:8) Leina “Jehofa” ke phetolelo ya Seisemane ya ditumammogo tše nne tša Seheberu tša YHWH, tšeo di emelago leina la Modimo. Leina leo le tšwelela ka makga a e ka bago a 7 000 ka Mangwalong a Seheberu. * Le gona, leina leo le dirišwa gantši go feta direto tše dingwe ka moka tše bjalo ka “Modimo,” “Ramatlaohle” goba “Morena.” E bile le tšwelela gantši kudu go feta maina a mangwe ka moka a ka Beibeleng, a bjalo ka Aborahama, Moshe goba Dafida.

Ka Beibeleng ga go na mo Jehofa a thibelago batho go diriša leina la gagwe ka tsela e hlomphegago. Go e na le moo, Mangwalo a bontšha gore bahlanka ba Modimo ba be ba diriša leina la gagwe ka bolokologi. Ba be ba le akaretša maineng ao ba bego ba a reela bana ba bona, a bjalo ka leina Eliya, leo le bolelago gore “Modimo wa ka ke Jehofa” gotee le la Sakaria, leo le bolelago gore “Modimo o Gopotše.” Le gona, ba be ba diriša leina la Modimo ka bolokologi dipoledišanong tša bona tša letšatši le letšatši.—Ruthe 2:4.

Modimo o nyaka gore re diriše leina la gagwe. Re kgothaletšwa gore re ‘leboge Jehofa gomme re bitše leina la gagwe.’ (Psalme 105:1) E bile o šetša “bao ba sa lebalego leina la gagwe.”—Maleaki 3:16.

Diithuti tše dingwe di dumela gore leina la Modimo ka Seheberu le ra gore, “Yo a Bakago go ba Gona.” Tlhaloso yeo e bontšha gore Modimo a ka dira gore yena goba tlholo ya gagwe e be selo le ge e le sefe bakeng sa go phetha thato ya gagwe. Modimo Ramatlaohle ke yena a nnoši a ka phelago ka go dumelelana le tlhaloso ya leina leo.

SEO LEINA LEO LE SE BOLELAGO GO WENA

Go tseba leina la Modimo go tla fetoša tsela yeo o mo lebelelago ka yona. Go tla ba bonolo gore o gwerane le yena. Go ba gona, o ka gwerana bjang le motho yo o sa tsebego leina la gagwe? Taba ya gore Modimo o go utolletše leina la gagwe e bontšha gore o nyaka gore o mmatamele.—Jakobo 4:8.

O ka kgodišega gore Jehofa o tla phela ka go dumelelana le tlhaloso ya leina la gagwe e le Modimo yo a dulago a phethagatša ditshepišo tša gagwe. Ke ka baka leo Beibele e rego: “Bao ba tsebago leina la gago ba tla go bota.” (Psalme 9:10) O bota Jehofa ge o dutše o lemoga gore leina la gagwe le sepedišana le dika tša gagwe tše bjalo ka lerato, kgaugelo, kwelobohloko le toka. (Ekisodo 34:5-7) Ruri go a homotša go tseba gore le ge Jehofa a phethagatša ditshepišo tša gagwe, le ka mohla a ka se ke a dira dilo ka go se dumelelane le dika tša gagwe.

Ruri ke tokelo go tseba Modimo Ramatlaohle ka leina. Seo se ka go tlišetša ditšhegofatšo gona bjale le nakong e tlago. Modimo o holofetša gore: “Ke tla mo šireletša ka gobane a tseba leina la ka.”—Psalme 91:14.

“Yo mongwe le yo mongwe yo a bitšago leina la Jehofa o tla phologa.”—Joele 2:32.