NO ANTOY IBABAGA NA ARUM

Maslak ed saray mangibabagan Kristiano ira et manisia ya Jesus so ngaran na Dios. Ibabaga balet na arum ya lapud saksakey so Makapanyarin-amin ya Dios, agla kaukolan ya usaren so personal ya ngaran to. Wala met iramay mangibabaga ya agnayarin usaren so personal ya ngaran na Dios.

NO ANTOY IBABAGA NA BIBLIA

Say ngaran na Makapanyarin-amin ya Dios et aliwan Jesus, ta aliwan si Jesus so Dios ya Makapanyarin-amin. Diad tua, imbangat nen Jesus iray kapara ton mandadayew ed Dios ya oniay ipikasi da: “Ama, napasanto komon so ngaran mo.” (Lucas 11:2) Si Jesus a mismo et impikasi to ed Dios: “Ama, igloriam so ngaran mo.”​—Juan 12:28.

Oniay nabasad Biblia ya imbaga na Dios: “Siak si Jehova. Saya so ngaran ko; agko iter so gloriak ed anggan siopa.” (Isaias 42:8) Say ngaran ya “Jehova” et Pangasinan ya patalos na apatiran Hebreon letra ya YHWH, a mangirerepresenta ed ngaran na Dios. Sayan ngaran et manga 7,000 beses ya nabasad Hebreon Kasulatan odino Daan ya Sipan. * Mas dakel itan nen say dinanman ya titulo, singa say “Dios,” “Makapanyarin-amin,” odino “Katawan,” tan mas dakel nen say arum nin ngaran, a singa say Abraham, Moises, odino David.

Anggapoy nabasad Biblia ya isesebel nen Jehova so marespeton pangusar o pamitla ed ngaran to. Imbes, ipapanengneng na Kasulatan ya say ngaran na Dios et naynay ya uusaren na saray lingkor to nensaman. Impila da itan ed ngaran na saray ananak da, singa say ngaran ya Elias, ya mankabaliksan na “Si Jehova so Dios Ko,” tan say Zacarias, ya mankabaliksan na “Anonotan nen Jehova.” Tan ag-ira manaalangan ya usaren so ngaran na Dios ed inagew-agew ya pantotongtong da.​—Ruth 2:4.

Labay na Dios ya usaren tayoy ngaran to. Ibabaga na Biblia ya “misalamat kayod si Jehova, tawag kayod ngaran to.” (Salmo 105:1) Maliket to ingen ya iimanoen iramay “mandadalepdep ed ngaran to.”​—Malaquias 3:16.

Panisiaan na arum ya scholar ya diad Hebreo say ngaran ya Jehova et mankabaliksan na “Pagmamaliwen To.” Ipapanengneng na satan ya say Dios et magmamaliw ed no antoy nakaukolan odino sarag ton pagmaliwen iray pinalsa to a gawaen so antokaman a nakaukolan pian nasumpal so gagala to. Say makapanyarin-amin ya Amalsa labat so makagawa ed kabaliksan na satan ya ngaran.

NO ANTOY EPEKTO ED SIKA

No antam so ngaran na Dios, nauman so iisipen mo tungkol ed sikato. Mas mainomay moy onapit ed sikato. Kasi, panon kan onapit ed sakey ya agmo amtay ngaran to? Diad tua, amay mismon impangipaamta na Dios ed ngaran to et mangipapanengneng ya labay ton onapit ka ed sikato.​—Santiago 4:8.

Makaseguro ka ya naynay ya gawaen nen Jehova no antoy kabaliksan na ngaran to​—ya lanang ton susumpalen so amin ya imbaga to. Kanian oniay ibabaga na Biblia: “Saramay kabat day ngaran mo et manmatalek ed sika.” (Salmo 9:10) Nawalaan ka na ontan ya panagmatalek legan mon nanaaralan ya say ngaran nen Jehova et mikonektaan ed saray kualidad to a singa say matoor a panangaro, panangasi, panangabagey, tan inkahustisya. (Exodo 34:5-7) Talagan balibalin naamtaan ya legan ya totooren nen Jehova so amin ya sipan to, agbalot manggawa na kontra ed saray kualidad to.

Baleg ya pribilehyo sirin ya naamtaan so ngaran na Makapanyarin-amin a Dios. Lapud satan et nabendisyonan ka natan tan diad arapen. Impromisa na Dios: “Sikatoy salimbengan ko lapud kabat toy ngaran ko.”​—Salmo 91:14.

“Balang sakey ya ontatawag ed ngaran nen Jehova et niliktar.”​—Joel 2:32.