NCOLYAAMBA BBAIBBELE
Zina lya Leza
Mamiliyoni aabantu balamwiita Leza kwiinda mukubelesya mazina aakwe aabulemu mbuli lyakuti Mwami, Walyoonse Alyoonse, Allah, naa lyakuti Leza. Nokuba boobo, Leza ulijisi zina limugeme. Sena mweelede kulibelesya?
Ino Leza nguni zina?
NZYOBAAMBA BANTU
Bantu banji ibalyaamba kuba Banakristo basyoma kuti zina lya Leza ngu Jesu. Bamwi baamba kuti mbwaanga kuli buyo Leza omwe Singuzuzyoonse, nkokuti tacigwasyi kubelesya zina lyakwe limugeme. Alimwi bamwi baamba kuti kubelesya zina lya Leza limugeme tacili kabotu.
NCOLYAAMBA BBAIBBELE
Jesu talili zina lya Leza Singuzuzyoonse, nkaambo Jesu tali Leza Singuzuzyoonse. Alimwi buya, Jesu wakayiisya bakombinyina kupaila kuli Leza kuti: “Taata, alisalazyigwe zina lyako.” (Luka 11:2) Jesu lwakwe wakapaila kuli Leza kuti: “Taata, kopa kuti zina lyako lilemekwe.”—Johane 12:28.
Mu Bbaibbele, Leza waamba kuti: “Ndime Jehova. Eeli ndezina lyangu; bulemu bwangu tandibupi umbi pe.” (Isaya 42:8) “Jehova” mbusanduluzi bwa Chitonga bwamabala one aa Chihebrayo aaya YHWH, alo aaiminina zina lya Leza. Zina eeli lilajanika ziindi zibalilwa ku 7,000 mu Magwalo aa Chihebrayo alimwi aitwa kuti Cizuminano Cakaindi. * Lilabelesyegwa ziindi zinji kwiinda mbwaabelesyegwa mazina aabulemu aali woonse mbuli aakuti “Leza,” “Singuzuzyoonse,” alimwi amazina aambi aali woonse mbuli aakuti Abrahamu, Musa naa Davida.
Kunyina Bbaibbele mpolyaamba kuti Jehova ulakasya kubelesya zina lyakwe munzila yabulemu. Muciindi caboobo, Magwalo atondezya kuti babelesi ba Leza bakali kulibelesya zina lya Leza cakulikwaya. Bakali kulibikkilizya mumazina ngobakali kupa bana babo mbuli lyakuti Elija, ilyaamba kuti “Leza Wangu Ngu Jehova,” alimwi alyakuti Zekariya, ilyaamba kuti “Jehova Wayeeya.” Alimwi tiibakali kuwayawaya kulibelesya zina lya Leza mumibandi yabo yabuzuba abuzuba.—Rute 2:4.
Leza uyanda kuti katulibelesya zina lyakwe. Tukulwaizyigwa ‘kumulumba Jehova akwiita zina lyakwe.’ (Intembauzyo 105:1) Alimwi buya ulababikkila maano aabo “bazinzibala kuyeeya zina lyakwe.”—Malaki 3:16.
“Bantu abazyibe kuti yebo, oojisi zina lyakuti Jehova, yebo olikke ndonduwe Mupatikampatila atala aanyika yoonse.”—Intembauzyo 83:18.
Ino zina lya Leza lyaamba nzi?
Basyaazibwene bamwi basyoma kuti mu Chihebrayo zina lya Jehova lyaamba kuti “Upa Kuti Kube.” Bupanduluzi oobu butondezya kuti Leza ulakonzya kuba naa kupa zilenge zyakwe kuba kufwumbwa ciyandika kutegwa azuzikizye makanze aakwe. Alikke Mulengi singuzuzyoonse nguukonzya kucita boobo.
NCOLYAAMBA KULINDINYWE
Kuzyiba ncolyaamba zina lya Leza kuyoomupa kucinca mbomuyeeya kujatikizya nguwe. Ciyoomuubila-ubila kuba acilongwe anguwe. Kayi kunyina mbomukonzya kuba acilongwe amuntu ngomutazyi zina. Mbwaanga Leza waliyubununa zina lyakwe kulindinywe, nkokuti uyanda kuti mube aacilongwe anguwe.—Jakobo 4:8.
Mulakonzya kuba masimpe kuti Jehova lyoonse unoocita zintu kweelana ancolyaamba zina lyakwe alimwi akuti ngu Leza uuzuzikizya zisyomezyo zyakwe lyoonse. Nkakaambo kaako Bbaibbele ncolyaamba kuti: “Aabo ibalizyi zina lyako banookusyoma.” (Intembauzyo 9:10) Mulakonzya kuba alusyomo luli boobo mbomuyaabwiiya kuti zintu zyoonse nzyacita Jehova ulazicita akaambo kabube bwakwe mbuli luyando lutamani, luse, lweetelelo alimwi abululami. (Kulonga 34:5-7) Eelo kaka cilakulwaizya kuzyiba kuti lyoonse Jehova unoozizuzikizya zisyomezyo zyakwe, kunyina nayoocita zintu mukwiimpana abube bwakwe!
Cilisalede kuti, kuzyiba zina lya Leza Singuzuzyoonse, ncoolwe caalubazu. Nkaambo kulakonzya kumuletela zilongezyo lino alimwi akumbele. Leza usyomezya kuti: “Ndiyoomukwabilila akaambo kakuti ulilizyi zina lyangu.”—Intembauzyo 91:14.
“Muntu woonse wiita zina lya Jehova uyoofwutulwa.”—Joeli 2:32.
Zina lya Leza mbolilembwa mumyaambo iindene-indene
^ munc. 9 Mubusanduluzi bunji bwama Bbaibbele zina lya Leza lyakagwisyigwa akubikka zina lyabulemu lyakuti “Mwami,” pele muma Bbaibbele aamwi zina lya Leza lijanika buyo mutupango tusyoonto naa mubupanduluzi buyungizyidwe. Mu Bbaibbele lya Busanduluzi Bwanyika Mpya zina lya Leza lilajanika mu Bbaibbele lyoonse mbolibede.
Andiza Inga Mwaakkomanina Ayaaya
NJIISYO ZYAMU BBAIBBELE ZIYANDIKA
Sena Leza Ulijisi Zina?
Leza ulijisi mazina aabulemu manji, kubikkilizya aakuti Singuzuzyoonse, Mulengi, alimwi a Mwami. Pele zina lya Leza limugeme lilajanika mu Bbaibbele ziindi ziinda ku 7,000.
MIBUZYO YAMU BBAIBBELE YAINGULWA
Sena Jesu nde Zyina lya Leza?
Jesu kunyina naakalyaamba kuti ngu Leza Singuzuzyoonse. Nkaambo nzi?
MIBUZYO YAMU BBAIBBELE YAINGULWA
Sena Jesu Ngu Leza Singuzuzyoonse?
Ncinzi Jesu ncaakaamba kujatikizya cuuno cakwe mbucakaindene acuuno ncajisi Leza?
