ELE ATTHU AKINA ANIHIMYA AYA:

MaKristau manceene anikupali wira nsina na Muluku ti Yesu. Akina anihimya wira Muluku Oowerya-sotheene ori mmosa paahi, nto khivanitthuneya orumeela nsina nawe. Nave-tho, akina anoona wira khivanireerela oromola nsina na Muluku.

ELE BIIBILIYA ONIHIMYA AWE:

Nsina na Muluku Oowerya-sotheene khahiyo Yesu, maana Yesu khahiyo Muluku Oowerya-sotheene. Tthiri, Yesu aahiwiixuttiha atthareli awe wira anvekeleke Muluku ariki: “Tithi, nsina nanyu nivuwihiwe”. (Luka 11:2) Nave-tho, Yesu aahinvekela Muluku oriki: “Tithi, nvuwihe nsina ninyu!”​—Yohani 12:28.

MBiibiliyani, Muluku onihimya wira: “Miyo kà Yahvéh, nla ti nsina naka, nkinrowa owìnnyerera akina ovuwa waka”. (Yesaya 42:8, Biblya Exirima) Nsina noowi “Yahvéh” wala Yehova, ninkhuma nttaava na eHeeberi. Naalempwa ni ileetera xexe YHWH. Nsina nlo ninniphwanyaneya ikwaha soowiiraka 7.000 mwa Soolempwa sa eHeeberi wala Wataana wa Khalai. * Nsina nla ninnitepa oromoliwa ovikana miihanelo manceene, ntoko “Muluku”, “Nanwerya-sotheene” wala “Apwiya”. Nave ninniromoliwa ovikana masina makina, ntoko Abrahamu, Moise, ni Davidi.

MBiibiliyani Yehova khonikhoottiha orumeeliwa nsina nawe mwa nttittimiho. Ohiya-vo, Biibiliya onnooniherya wira arumeyi a Muluku yaanirumeela mootaphuwa nsina na Muluku. Awo yaanaavaha anaaya masina yaavarihana ni nsina na Muluku. Mwa ntakiheryo: Eliya nintaphulela “Muluku aka ti Yehova”; ni Zakariya nintaphulela “Yehova Ohuupuwela”. Nave awo khiyoovelela orumeela nsina na Muluku khula nihiku.​—Ruthi 2:4.

Muluku oniphavela wira nirumeeleke nsina nawe. Hiyo ninnitumereriwa ‘omutthapela Yehova, ni ovuwiha nsina nawe’. (Esalimo 105:1, Tradução do Novo Mundo da Bíblia Sagrada). Owo onnaathokorerya atthu ale ‘anittittimiha’ nsina nawe.​—Malakhiya 3:16.

Asomi akina anikupali wira nsina noowi Yehova, nttaava na eHeeberi nintaphulela wira “Owo Onniiriha Okhala”. Eyo entaphulela wira Muluku onnikhala wala onniiriha soopattuxa sawe okhala khula etthu eniphavela awe. Mpattuxa oowerya-sotheene paahi toniwerya okhala moovarihana ni nsina nawe.

MOOTA ENOOPHWANYIHAYANI MUREERELO:

Osuwela nsina na Muluku onimookhaliheryani oturuka muupuwelo anyu voohimya sa yena. Munimoona wira ti vookhweya okhala mpatthani awe. Masi, munrowa owerya sai okhala mpatthani a mutthu muhisuwelaka nsina nawe? Tivonto, okhala wira Muluku ohoosuwelihani nsina nawe, owo oniphavela wira mukhale mpatthani awe.​—Yakobo 4:8.

Mukupaliki wira Yehova okathi wotheene onrowa okhalaka moovarihana ni nsina nawe wira aakhwaniherye khula etthu eleihenrye awe. Biibiliya oni: “Ale anosuwelani yororomeleni”. (Esalimo 9:11) Okathi muniixutta anyu wira nsina na Yehova ninnivarihana ni mikhalelo sawe, ntoko ophenta, omoriwa ikharari, oreera murima ni exariya, nroromelo nanyu nnoolipa. (Okhuma 34:5-7) Nto, etthu ennikupaliha wira Yehova onoomaleliha sooleiherya sawe, okhala wira owo onikhala moovarihana ni mikhalelo sawe.

Tthiri, eparakha osuwela nsina na Muluku Oowerya-sotheene. Eyo enimoophwanyihani mareeliho vano ni muhoolo. Muluku onileiherya wira: “Miyo kinniwòpola ankiroromela: kinniwettiherya anromola nsina naka”.​—Esalimo 91:14.

“Othene ale anrowa oromola nsina n’Apwiya, animopowa”.​—Yoweli 3:5.