AN GINSISIRING HAN PIPIRA

Damu han nag-aangkon nga Kristiano an natoo nga Jesus an ngaran han Dios. An iba naghuhunahuna nga tungod kay usa la an Dios nga Makagarahum-ha-ngatanan, diri na kinahanglan gamiton an iya personal nga ngaran. Ngan an iba nangangatadongan nga diri angayan gamiton an ngaran han Dios.

AN GINSISIRING HAN BIBLIA

Diri Jesus an ngaran han Dios nga Makagarahum-ha-ngatanan, kay hi Jesus diri an Dios nga Makagarahum-ha-ngatanan. Ngani, gintutdoan ni Jesus an iya mga igkasi-magsiringba nga mag-ampo ha Dios, nga nasiring: “Amay, pagbaraanon an imo ngaran.” (Lucas 11:2) Hi Jesus mismo nag-ampo ha Dios: “Amay, himayaa an imo ngaran.”—Juan 12:28.

Ha Biblia, an Dios nasiring: “Ako hi Jehova, amo ito an akon ngaran; ngan an akon himaya diri ko ihahatag ha iba.” (Isaias 42:8) An “Jehova” amo an Waray-Waray nga hubad han upat nga Hebreo nga letra nga YHWH, nga nagrirepresentar han ngaran han Dios. Mababasa ito hin mga 7,000 ka beses ha Hebreo nga Kasuratan. * Mas agsob ito gamiton kay ha bisan ano nga titulo, sugad han “Dios,” “Makagarahum-ha-ngatanan,” o “Ginoo,” ngan kay ha bisan ano nga ngaran sugad han Abraham, Moises, o David.

Waray mababasa ha Biblia nga igindidiri ni Jehova an matinalahuron nga paggamit han iya ngaran. Lugod, iginpapakita han Biblia nga an ngaran han Dios pirme ginagamit han mga surugoon han Dios han naglabay. Igin-upod nira ito ha ngaran nga ira iginhatag ha ira mga anak, sugad han Elias nga nangangahulogan hin “Hi Jehova an Akon Dios,” ngan Sakarias nga nangangahulogan hin “Hi Jehova Nahinunumdom.” Ngan waray hira mag-alang paggamit han ngaran han Dios ha ira adlaw-adlaw nga pag-iristorya.—Rut 2:4.

Karuyag han Dios nga gamiton naton an iya ngaran. Gin-aaghat kita ha “paghatag hin mga pasalamat ngadto kan Jehova, pag sangpit han iya ngaran.” (Salmos 105:1) Iya pa ngani gintitigamnan adton ‘naghuhunahuna han iya ngaran.’—Malakias 3:16.

Natoo an iba nga eskolar nga ha Hebreo, an ngaran nga Jehova nangangahulogan hin “Hiya Nagpapahinabo nga Magin.” Ito nga kahulogan nagpapasabot nga mahimo pahinaboon han Dios an iya kalugaringon ngan an iya mga linarang nga magin bisan ano nga ginkikinahanglan basi matuman an iya katuyoan. An makagarahum nga Maglalarang la an makakatuman han kahulogan hito nga ngaran.

AN KAPULSANAN HITO HA IMO

An paghibaro han ngaran han Dios magbabag-o han imo panhunahuna mahitungod ha iya. Mahibabaroan mo nga masayon la nga magin duok ha iya. Aw, paonan-o ka magigin duok ha usa nga diri mo kilala an ngaran? An pagtugot han Dios nga mahibaroan mo an iya ngaran nagpapakita nga karuyag niya nga magin duok ka ha iya.—Santiago 4:8.

Makakasiguro ka nga pirme magios hi Jehova uyon ha iya ngaran sugad nga Dios nga pirme nagtutuman han iya mga saad. Salit an Biblia nasiring: ‘Hira nga nakilala han imo ngaran masarig ha imo.’ (Salmos 9:10) Magkakaada ka hito nga pagsarig samtang nahibabaroan mo nga an ngaran ni Jehova konektado gud ha iya mga kalidad sugad han maunungon nga gugma, kalooy, pagpaid, ngan hustisya. (Eksodo 34:5-7) Makaparig-on gud hibaroan nga gintutuman pirme ni Jehova an iya mga saad ngan diri hiya magios kontra ha iya mga kalidad.

Matin-aw, usa nga pribilehiyo an pagkilala han ngaran han Dios nga Makagarahum-ha-ngatanan. Mahimo ito magresulta hin mga bendisyon ha imo yana ngan ha tidaraon. An Dios nagsasaad: “Akon hiya luluwason . . . kay kinilala niya an akon ngaran.”—Salmos 91:14.

“Bisan hin-o nga magtawag han ngaran ni Jehova maluluwas.”—Joel 2:32.