“TODIDO YIN . . . DANDANNU DE NA GBẸNINỌ MÍTỌN TO GBIGBỌ-LIHO,” wẹ owe lọ Hope in the Age of Anxiety dọ. “E sọ yin pọngbọ dagbe hugan lọ nado duto flumẹjijẹ, ṣokẹdẹninọ po obu po ji.”

Biblu dohia dọ mí do hudo todido tọn bosọ na mí avase sọta todido ovọ́ lẹ. “Mì ze jidide mìtọn do ahọvi lẹ mẹ blo kavi do gbẹtọvi depope mẹ blo, na yé ma sọgan whlẹnmẹ gán,” wẹ Salmu lẹ 146:3 dọ. Kakati nado dejido vivẹnudido gbẹtọvi tọn lẹ go nado whlẹn mí, e pọnte hugan nado dejido Mẹdatọ mítọn go, mẹhe tindo huhlọn nado hẹn opagbe etọn lẹpo di. Opagbe tẹlẹ wẹ e do na mí? Mí ni gbadopọnna delẹ.

KANYINYLAN NA DOALỌTE; JIJỌHO DẸN-TO-AIMẸ NA TIN NA DODONỌ LẸ: “Na whenu pẹẹde dogọ, mẹylankan lẹ ma na tin ba . . . Ṣigba, homẹmimiọnnọ lẹ wẹ na dugu aigba tọn, yé nasọ nọ mọ awuvivi susu to jijọho susugege mẹ,” wẹ Salmu lẹ 37:10, 11 dọ. Wefọ 29 yidogọ dọ ‘dodonọ lẹ na nọgbẹ̀ kakadoi’ to aigba ji.

AWHÀN NA DOALỌTE: “Jehovah . . . to awhàn hẹnwa opodo lẹdo aigba pé. E wẹ́n ogá bo sán owhán do flinflin; e yí miyọ́n do mẹ̀ awhàn-kẹkẹ lẹ.”—Salmu lẹ 46:8, 9.

AZỌ̀N, YAJIJI KAVI OKÚ MA NA TIN BA: “Gòhọ Jiwheyẹwhe tọn tin to gbẹtọvi lẹ dè . . . Ewọ nasọ súnsún dasin lẹpo sẹ̀ sọn nukun yetọn mẹ, okú ma nasọ tin ba, mọjanwẹ aluẹmẹninọ kavi avi kavi awufiẹsa ma nasọ tin ba.”—Osọhia 21:3, 4.

NÚDÙDÙ NA PÉ MẸLẸPO: “Jinukun susugege na tin to aigba ji; e na gọfla to osó lẹ ji aga.”—Salmu lẹ 72:16.

GANDUDU DODO GBỌN AHỌLU DOPO DALI—AHỌLUDUTA KLISTI TỌN: “Yè sọ yí gandudu, gbégbò po ahọluduta de po na [Jesu Klisti], na gbẹtọ lẹ, akọta lẹ po akọ̀ lẹpo po nido nọ wadevizọn na ẹn. Gandudu madopodo de wẹ gandudu etọn bo ma na juwayi, ahọluduta etọn ma nasọ yin vivasudo.”—Daniẹli 7:14.

Nawẹ mí gán wagbọn do dejido opagbe enẹlẹ go? To whenue Jesu to aigba ji, e do kunnudenu lẹ hia dọ emi pegan nado yin Ahọlu Dide enẹ. E hẹnazọ̀ngbọnamẹ, na núdùdù wamọnọ lẹ, bo fọ́n oṣiọ lẹ sọnku. Dehe tlẹ sọ yin nujọnu hugan wẹ mẹpinplọn etọn, na e plọnmẹ anademẹ he na gọalọna gbẹtọ lẹ nado nọgbẹ̀ kakadoi to jijọho po pọninọ po mẹ lẹ. Jesu sọ dọdai gando sọgodo go, bo dọ nuhe na dohia dọ mí ko to gbẹnọ to azán godo tọn titonu ehe tọn lẹ mẹ.

Jesu ma dọ dọdai dọ jijọho po hihọ́ po wẹ na dohia dọ mí to gbẹnọ to azán godo tọn lẹ mẹ gba, kakatimọ nuhahun lẹ wẹ na do enẹ hia! Bẹplidopọ ohia “vivọnu titonu lọ tọn” he e na lẹ bẹ awhàn lẹdo aihọn pé, núdùdù whèdomẹ, azọ̀nylankan po aigba sisọsisọ daho lẹ po hẹn. (Matiu 24:3, 7; Luku 21:10, 11; Osọhia 6:3-8) Jesu sọ dọmọ: “Na jideji sẹ́nhẹngba tọn wutu, owanyi suhugan gbẹtọ lẹ tọn na miọn.”—Matiu 24:12.

Ninọmẹ ylankan enẹ sọ sọawuhia to aliho devo lẹ mẹ, dile Biblu-kantọ devo dọ dọdai etọn tlọlọ do. Mí hia to 2 Timoti 3:1-5 mẹ dọ, to “azán godo tọn lẹ” mẹ, gbẹtọ lẹ to paa mẹ, na nọ yiwanna yede, akuẹ po gbẹdudu po. Yé na yin goyitọ podọ kanylantọ. Whẹndo lẹ ma na tindo owanyi jọwamọ tọn, podọ ovi lẹ na nọ vẹtolina mẹjitọ lẹ. Yẹnuwiwa sinsẹ̀n tọn na gbayipe.

Ninọmẹ he nọ hẹn yajiji wá enẹlẹ dohia dọ aihọn ehe ko biọ azán godo tọn etọn lẹ mẹ. Yé sọ dohia dọ kọgbọ he Ahọluduta lọ na hẹnwa ko sẹpọ. Jesu na mí jide he bọdego to dọdai he e dọ gando azán godo tọn lẹ go mẹ dọmọ: “Yẹwheho wẹndagbe Ahọluduta lọ tọn ehe na yin didọ to aigba fininọ lẹpo ji taidi okunnu de na akọta lẹpo, podọ whenẹnu wẹ opodo lọ na wá.”—Matiu 24:14.

Wẹndagbe enẹ na avase ylanwatọ lẹ bo na todido dodonọ lẹ dọ dona he yin opagbe etọn do lọ lẹ na wá to madẹnmẹ. Be e na jlo we nado plọnnu dogọ gando dona ehelẹ go ya? Eyin mọ wẹ, jaale lilẹ́ weda godo tọn linlinnamẹwe ehe tọn.