“E TĀUA LE FAAMOEMOE . . . I LO TATOU OLA FAALEAGAGA.” O le faamatalaga lenā o loo i le tusi Hope in the Age of Anxiety, ma ua faapea atili mai: “O le vaifofō sili lea i le foʻia o faalogona lē toʻa, faaesea o le tagata lava ia, ma le fefe.”

O loo faailoa mai i le Tusi Paia le manaʻomia ona iai so tatou faamoemoe. Ua lapataʻi mai foʻi le Tusi Paia e faatatau i faamoemoega sesē. Ua faapea mai le Salamo 146:3: “Aua tou te faatuatua atu i tamālii, po o le fanau a tagata e lē o iai se faaolataga.” Nai lo o le tuu atu o o tatou faatuatuaga i taumafaiga a tagata ina ia laveaʻiina i tatou, o se mea atamai lo tatou maufaatuatuaina o Lē na foafoaina i tatou, ma o lē e iai lona mana e faataunuu ai ana folafolaga. O ā mea ua ia folafolaina mai? Mātau nisi o folafolaga nei.

O LE A TAFIESEA LE AMIOLEAGA ONA MAUA LEA E TAGATA AMIOTONU LE FILEMU E TUMAU: “Ua toeitiiti lava ona lē toe iai lea o le tagata amioleaga . . . A o ē e agamalu, e fai mo i latou le lalolagi, e matuā faafiafiaina foʻi i latou ona o le tele o le filemu.” (Salamo 37:10, 11) Ua taʻua i le Salamo 37:29 o le a “fai lava le lalolagi mo ē e amiotonu.”

FAAIʻUINA TAUA: “Ua ia [Ieova] faaiʻuina taua i tuluʻiga o le lalolagi. Ua ia gauia foʻi le ʻaufana ma vaevaeina le tao; ma ua ia susunuina i le afi o taavale toso.”​—Salamo 46:8, 9.

E LĒ TOE IAI MAʻI, MAFATIAGA, PO O LE OTI: “Ua iai i tagata le faleʻie o le Atua . . . E na te soloiesea foʻi loimata uma i o latou mata, e lē toe iai se oti, po o se faanoanoa, po o se tagiauē, e lē toe iai foʻi se tigā.”​—Faaaliga 21:3, 4.

FAU MA SOLOI MEAʻAI MO TAGATA UMA: “O le a tele saito i le laueleele; o le a fau ma soloi i tumutumu o mauga.”​—Salamo 72:16.

SE FAIGĀMALO E TASI E AMIOTONU​—MALO O KERISO: “Ua tuuina atu iā te ia [Iesu Keriso] le pule, o le mamalu ma le malo, ina ia auauna iā te ia o tagata ma nuu ma gagana uma. O lana pule, o le pulega lea e tumau e lē mavae atu, e lē faaumatia foʻi lona malo.”​—Tanielu 7:14.

Aiseā e tatou te mautinoa ai o le a taunuu na folafolaga? A o iai Iesu i le lalolagi, na ia faaalia atu i le lautele lona agavaa e avea ma Tupu Tofia. Na ia faamālōlō maʻi, fafaga ē matitiva, ma toe faatutūina foʻi ē maliliu. Ae e sili atu ai ona tāua ana aʻoaʻoga, ia sa aofia ai taʻiala e mafai ai e tagata ona ola e faavavau i se tulaga autasi ma filemu. Na valoia foʻi e Iesu mea o le a tutupu i le lumanaʻi, e aofia ai faailoga e iloa ai aso e gata ai lea ua tatou ola ai nei.

Na valoia e Iesu o le a iloa aso e gata ai i le leai o se filemu ma se saogalemu. O faailoga na ia taʻua e iloa ai le “taufaaiʻuiʻuga o le faiga o mea a le lalolagi,” na aofia ai faigātaua i le va o atunuu, oge, faamaʻi, ma mafuiʻe tetele. (Mataio 24:3, 7; Luka 21:10, 11; Faaaliga 6:3-8) Na fetalai foʻi Iesu: “O le a maalili le alofa o le toʻatele ona ua faatuputeleina le amioleaga.”​—Mataio 24:12.

Na taʻua patino foʻi e se isi tusitala o le Tusi Paia auala eseese e iloa ai le maalili o le alofa o tagata. Ua faapea mai le 2 Timoteo 3:1-5, “o aso e gata ai” o le a iai tagata e alolofa iā i latou lava, mananaʻo tele i tupe, ma o le a naunau i mea faafiafia. O le a leai se lotoaiga, lē usiusitaʻi fanau i mātua, ma o le a taatele i tagata le faafoliga mai e alolofa i le Atua.

O na tulaga leaga ua faamautinoa mai ai ua iai lenei lalolagi i aso e gata ai. Ua faamautinoa mai ai foʻi ua toeitiiti oo mai le taimi e aumaia ai e le Malo o le Atua le filemu. O le mea moni, i le valoaga a Iesu e faatatau i aso e gata ai, na ia faaaofia mai ai le faamautinoaga lenei: “O le a talaʻiina atu lenei tala lelei o le malo i le lalolagi atoa e fai ma molimau i atunuu uma; ona oo mai ai lea o le iʻuga.”​—Mataio 24:14.

O lenā tala lelei ua aumaia ai foʻi se lapataʻiga mo ē amioleaga ma se faamoemoe mo ē amiotonu, auā e faamautinoa atu ai i ē amiotonu ua toeitiiti taunuu folafolaga uma e faatatau i faamanuiaga o le Malo. Pe e te fia iloa atili e uiga i na faamanuiaga? Afai o lea, faamolemole tagaʻi i le itulau mulimuli o lenei mekasini.