“KU VA NI NTSHEMBO I SWA NKOKA EVUTON’WINI BYA HINA,” leswi swi vuriwe hi buku leyi nge: Hope in the Age of Anxiety. Nakambe yi tlhela yi ku: “I murhi lowukulu lowu endlaka leswaku hi hlula ku titwa hi nga pfuni nchumu ni ku chava.”

EBibeleni hi hlaya hi xilaveko xo va ni ntshembo naswona yi tlhela yi hi tsundzuxa leswaku hi papalata ku tshemba swilo leswi nga riki ntiyiso. Pisalema 146:3 yi ri: “Mi nga tshembi vanhu va xiyimo xa le henhla, hambi ku ri n’wana wa munhu wa nyama, loyi a tsandzekaka ku ponisa.” Ematshan’wini yo tshemba vanhu, hi va hi tlharihile loko hi tshemba muvumbi wa hina la nga ni matimba yo hetisisa switshembiso swakwe. U hi tshembise yini? Xiya leswi landzelaka.

VANHU VO BIHA A VA NGE HE VI KONA NASWONA VANHU VO LULAMA VA TA VA NI KU RHULA: Pisalema 37:10, 11 yi ri: “Hi nkarhinyana, lowo homboloka a nge he vi kona . . . Kambe lavo rhula va ta dya ndzhaka ya misava, hakunene va ta kuma ntsako lowu heleleke eku rhuleni lokukulu.” Nakambe ndzimana 29 yi ri: “Lavo lulama . . . va ta tshama hi masiku” laha misaveni.

TINYIMPI TI TA HERISIWA: ‘Yehovha u ta herisa tinyimpi ku ya fika emakumu ya misava. Vurha u ta byi tshova hi le xikarhi naswona u ta tshovelela fumu; tigolonyi u ta ti hisa endzilweni.’—Pisalema 46:8, 9.

A KU NGE HE VI NA VUVABYI KU XANISEKA KUMBE RIFU: “Ntsonga wa Xikwembu wu le vanhwini, . . . Xi ta sula mihloti hinkwayo ematihlweni ya vona, rifu a ri nge he vi kona, hambi ku ri ku kolola, ni xirilo ni xitlhavi a swi nge he vi kona.”—Nhlavutelo 21:3, 4.

KU TA VA NI SWAKUDYA LESWI ENELEKE SWA VANHU HINKWAVO: “Ku ta va ni mavele yo tala emisaveni; ma ta khapakhapa etinhlohlorhini ta tintshava.”—Pisalema 72:16.

KRESTE U TA FUMA MISAVA HINKWAYO: “[Yesu Kreste] a nyikiwa ku fuma ni xindzhuti ni mfumo, leswaku vanhu, vanhu va matiko ni tindzimi hinkwato va n’wi tirhela. Ku fuma ka yena i ku fuma loku tshamaka hilaha ku nga heriki loku ku nga ta ka ku nga hundzi, mfumo wakwe a wu nge lovisiwi.”—Daniyele 7:14.

I yini leswi hi tshembisaka leswaku switshembiso sweswo swi ta endleka? Loko a ri laha misaveni Yesu u kombise leswaku wa faneleka ku va Hosi. U horise lava vabyaka, a phamela swisiwana ni ku pfuxa lava feke. Xa nkoka a ku ri tidyondzo takwe hikuva a ti dyondzisa ni leswi hi nga swi endlaka leswaku hi hanyisana hi ku rhula ni ku va ni vun’we. Yesu u tlhele a vulavula hi swiendlakalo swa le nkarhini lowu taka ku katsa ni leswi a swi ta kombisa leswaku hi hanya emasikwini ya makumu.

Yesu u vule leswaku masiku ya makumu ma ta vonaka hi swiyimo swo tika. U vule leswaku swikombiso swa “makumu ya mafambiselo ya swilo” swi ta katsa ku lwa ka matiko, ku kayivela ka swakudya, mintungu, ni ku tsekatseka ka misava. (Matewu 24:3, 7; Luka 21:10, 11; Nhlavutelo 6:3-8) U tlhele a ku: “Rirhandzu ra vo tala ri ta hola hikwalaho ka ku engeteleka ka ku kala nawu.”—Matewu 24:12.

Ku hola ka rirhandzu rolero ku vonaka hi tindlela to tala hilaha mutsari un’wana wa Bibele a swi vuleke hakona hi ku kongoma eBibeleni. Eka 2 Timotiya 3:1-5 hi hlaya leswaku “emasikwini yo hetelela” vanhu va ta va lava tirhandzaka, lava rhandzaka mali ni mintsako ku tlula mpimo. Va ta va lava titlakusaka ni ku rhandza tinyimpi. Mindyangu yo tala a yi nge he rhandzani naswona vana a va nge he yingisi vatswari. Nakambe ku ta tala vukhongeri bya mavunwa.

Swiyimo sweswo hinkwaswo swi kombisa leswaku hi hanya emasikwini ya makumu. Swi tlhela swi kombisa leswaku Mfumo wa Yesu Kreste wu tshinele. Yesu u tlhele a katsa mhaka leyi landzelaka loko a vulavula hi masiku ya makumu: “Mahungu lamanene lawa ya mfumo ma ta chumayeriwa emisaveni hinkwayo leyi akiweke leswaku byi va vumbhoni ematikweni hinkwawo; kutani hi kona makumu ma nga ta fika.”—Matewu 24:14.

Mahungu wolawo lamanene ma nyika xitsundzuxo eka lava endlaka leswo biha ni ntshembo eka lava lulameke leswaku switshembiso swa Xikwembu swi ta endleka ku nga ri khale. Xana u nga tsakela ku dyondza swo tala mayelana ni mikateko leyi? Loko swi ri tano hi kombela u pfula tluka ro hetelela eka magazini lowu.