Wahn hozban ahn wahn waif weh werk haad fi ga wahn schrang ahn hapi marij stay tugeda dehn hoal laif, ahn dat mek dehn feel sayf. Dehn noa dat dehn wahn stay tugeda eevn wen dehn goh chroo tof sichuwayshanz.

Sohn marid kopl mait feel laik dehn haftu stay tugeda jos bikaaz dehn frayd fi weh dehn famili ahn frenz mait tink if dehn geh divoas. Bot dat shudn bee di mayn reezn wai dehn stay tugeda. Weh moa impoatant da fi mek koplz lov ahn rispek wan anada.

BAIBL PRINSIPL: “Wahn hozban noh fi lef ih waif.”—1 Korintyanz 7:11.

“If yu waahn yu marij fi laas, yu kyaahn eezi fi kech feelinz. Yu need fi bee redi fi fergiv ahn seh sari. Yu noh fi si prablemz az wahn reezn fi geh wahn divoas. Insteda dat, si dehn az smaal prablemz weh ku geh fiks.”—Micah.

Peepl weh noh si marij az sohnting weh fi laas wahn chrai fain wayz fi get owta di marij wen prablemz kom op. Dehn mait seh, ‘Wee noh mek fi eech ada.ʼ

“Wahn lata peepl geh marid di tink dat if, fi sohn reezn, dehn marij noh werk owt, dehn ku jos geh wahn divoas. Peepl weh ga da kaina tinkin bifoa dehn geh marid giv op eezi ahn noh tek dehn marij seeryos.”—Jean.

AKS YUSELF

Wen wi noh gree pahn sohnting . . .

• Ah sari dat Ah marid ahn?

• Ah fain miself di imajin dat Ah deh wid sombadi els?

• Ah seh tingz laik, “Ah wahn lef yu” er “Ah wahn fain sombadi weh apreeshiayt mee”?

If yu ansa yes tu eni a dehnya kweschanz, now da di taim fi mek yu werk haad pahn yu marij soh dat unu stay tugeda.

DISKOS DEHNYA KWESCHAN WID EECH ADA

• Yoo feel di saym way laik wen wee mi jos geh marid? If nat, wai?

• Weh wi ku du fi mek wi marij geh schranga?

SOHN TINGZ WEH KU HELP UNU

• Now an agen rait wahn lee lov leta tu wan anada fi shoa humoch unu lov eech ada

• Kip wahn picha a yu hozban er waif da werk

• Kaal er teks eech ada evri day

BAIBL PRINSIPL: “Noh mek nobadi separayt weh Gaad jain tugeda.”—Machyu 19:6.