Para Iti Agassawa
1: Kinamatalek
TI KAIPAPANANNA
Ti agassawa a determinado a mangtaginayon iti relasionda ibilangda a permanente ti panagtiponda, isu a natalged ti riknada. Agtalek ti agassawa a saanda nga agsina uray tumaud ti narigat a kasasaad.
Dadduma nga agassawa ti mapilitan a makitipon latta iti asawada gapu kadagiti gagayyem wenno pamiliada. Ngem nasaysayaat no ti rason a dida agsina ket gapu iti ayat ken respetoda iti maysa ken maysa.
PRINSIPIO TI BIBLIA: “Saan koma a panawan ti lalaki ti asawana.”—1 Corinto 7:11.
“No determinadoka a mangtaginayon iti panagasawayo, nakasaganaka nga agpaabak. Alistoka a mangpakawan ken agpadispensar. Ibilangmo dagiti problema kas lapped, saan a mamagsina.”—Micah.
NO APAY A NAPATEG
No adda problema, dagiti agassawa a saan a determinado a mangtaginayon iti relasionda mabalin nga ibagada, ‘Talaga a saankami a para iti maysa ken maysa’ ken agbirokda iti rason a makisina.
“Adu dagiti makiasawa a mangpampanunot a no saan nga agballigi ti panagassawada, mabalinda ti makidiborsio. No makiasawa ti maysa a pampanunotenna a mabalinnanto latta ti makidiborsio, saan a natibker ti panagassawada iti rugi pay laeng.”—Jean.
TI MABALINMO NGA ARAMIDEN
SUBOKEM TI BAGIM
No agap-apakayo . . .
-
Pagbabbabawyam kadi nga isu ti naasawam?
-
Ar-arapaapem kadi a sabali ti kaduam?
-
Ibagbagam kadi a “Panawankan” wenno “Agbirokak iti sabali a mangayat kaniak”?
No wen ti sungbatmo iti maysa wenno ad-adu pay kadagita a saludsod, itan ti tiempo a patibkerenyo ti relasionyo nga agassawa.
PAGSARITAANYO NGA AGASSAWA
-
Kimmapuy kadin ti determinasionta a mangtaginayon iti relasionta? No wen, apay?
-
Ania dagiti aramidenta tapno natibtibker ti relasionta?
TIP
-
Sagpaminsan a mangtedka iti ababa a mensahe iti asawam
-
Mangidispleyka iti retrato ti asawam iti lamisaanmo iti pagtrabahuam
-
Inaldaw a tawagam ti asawam bayat nga addaka iti pagtrabahuam wenno no aginnaddayokayo
PRINSIPIO TI BIBLIA: “Ti pinagtipon ti Dios, saan koma a pagsinaen ti tao.”—Mateo 19:6.